पोलिस निरीक्षक संदीप पाटील अखेर निलंबित
जळगाव: एका महिलेवर अत्याचार केल्याच्या गंभीर आरोपांनंतर स्थानिक गुन्हे शाखेचे (LCB) पोलिस निरीक्षक संदीप पाटील यांना अखेर निलंबित करण्यात आले आहे. नाशिक परिक्षेत्राचे विशेष पोलिस महानिरीक्षक दत्तात्रय कराळे यांनी काल (५ सप्टेंबर) संध्याकाळी याबाबतचे आदेश दिले.
आमदार चव्हाण यांच्या आरोपानंतर कारवाई
आमदार मंगेश चव्हाण यांनी जिल्हा नियोजन समितीच्या बैठकीत पोलिस निरीक्षक संदीप पाटील यांच्यावर गंभीर आरोप केले होते. त्यानंतर एका महिलेने तक्रार दाखल केली. जरी त्या महिलेने नंतर तक्रारीचा पाठपुरावा केला नाही, तरी वरिष्ठ अधिकाऱ्यांनी या प्रकरणाची गंभीर दखल घेत चौकशी सुरू केली होती. चौकशीअंती पाटील यांना निलंबित करण्याचा निर्णय घेण्यात आला.
या घटनेमुळे जिल्हा पोलिस दलात मोठी खळबळ उडाली आहे. पोलिस दलातील महिला कर्मचाऱ्यांची सुरक्षा आणि विश्वास अबाधित राखण्यासाठी अशा कठोर भूमिका घेणे आवश्यक असल्याचे मत विविध स्तरांतून व्यक्त होत आहे.
