‘दक्षता’ पेट्रोल पंपातील १.३३ कोटींचा अपहार; पीएसआय वाल्मीक वाघ शरण
पोलिसांची कारवाई; मुलगा शेखर वाघलाही अटक
जळगाव (प्रतिनिधी) — जळगाव पोलीस दलाच्या वतीने चालविण्यात येणाऱ्या ‘दक्षता’ पेट्रोल पंपावरील तब्बल १ कोटी ३३ लाख रुपयांच्या बहुचर्चित अपहार प्रकरणात मुख्य संशयित आरोपी असलेले व्यवस्थापक तथा पोलीस उपनिरीक्षक वाल्मीक मधुकर वाघ अखेर सोमवारी (दि. ९) पोलिसांसमोर शरण आले. पोलिसांनी वाघ यांना ताब्यात घेत त्यांच्या मुलगा शेखर वाघ यालाही अटक केली असून या कारवाईमुळे पोलीस दलात मोठी खळबळ उडाली आहे.
जळगाव पोलीस दलाच्या मानव संसाधन विभागामार्फत ‘दक्षता’ पेट्रोल पंप चालविण्यात येतो. या पंपाच्या दैनंदिन आर्थिक व्यवहारांची संपूर्ण जबाबदारी व्यवस्थापक म्हणून वाल्मीक वाघ यांच्याकडे होती. दरम्यान, करण्यात आलेल्या लेखापरीक्षणात (ऑडिट) पंपाच्या खात्यात तब्बल १ कोटी ३३ लाख ७५२ रुपयांची तफावत आढळून आली होती. या अनियमिततेनंतर वाघ यांच्याविरुद्ध फसवणूक आणि अपहाराचा गुन्हा दाखल करण्यात आला होता. गुन्हा दाखल झाल्यानंतर ते काही दिवसांपासून फरार होते.
दरम्यान, पोलिसांकडून त्यांच्या शोधासाठी विशेष पथके विविध ठिकाणी पाठविण्यात आली होती. अटकेची टांगती तलवार आणि वाढता पोलीस दबाव लक्षात घेता सोमवारी वाल्मीक वाघ यांनी स्वतःहून स्थानिक गुन्हे शाखेच्या कार्यालयात हजेरी लावली.
पोलीस अधीक्षक डॉ. महेश्वर रेड्डी यांच्या मार्गदर्शनाखाली तपासाधिकारी राहुल गायकवाड यांनी त्यांची सखोल चौकशी केली. या प्रकरणात त्यांच्या मुलाचा सहभाग असल्याच्या संशयावरून शेखर वाघ यालाही पोलिसांनी अटक केली असून पुढील तपास सुरू आहे.
