जळगाव : तक्रार दिल्याच्या कारणावरुन तरुणाची दुचाकी अडवून त्याला मारहाण केली. तसेच रस्त्यावर पडलेला दगड उचलून तरुणाच्या चेहऱ्यावर मारुन त्याला गंभीर जखमी केल्याची घटना दि. १४ रोजी शाहूनगरातील मटन मार्केट जवळ घडली. याप्रकरणी शाहरुख उर्फ बिल्डर हुसेन भिस्ती (रा. शाहूनगर) याच्याविरुद्ध गुन्हा दाखल करण्यात आला आहे.
शहरातील शाहूनगरातील भिस्ती मोहल्ल्यात अनसार हसन भिस्ती (वय २२) हा तरुण वास्तव्यास आहे. दि. १४ फेब्रुवारी रोजी दुपारी दोन वाजेच्या सुमारास तो दुचाकीने शाहूनगरातील मटन मार्केट परिसरातून जात होता. यावेळी तक्रार दिल्याच्या कारणावरुन शाहरुख उर्फ बिल्डर हुसेन भिस्ती याने अनसार भिस्ती याची दुचाकी अडविली. तसेच त्याच्यासोबत वाद घालून त्याने रस्त्यावर पडलेला दगड उचलून अनसार याच्या तोंडावर मारला. यामध्ये अनसार हा गंभीर जखमी झाला असून त्याने शहर पोलिसात तक्रार दिली. त्यांच्या तक्रारीवरुन शाहरुख उर्फ बिल्डर हुसेन भिस्ती रा. शाहूनगर याच्याविरुद्ध गुन्हा दाखल करण्यात आला आहे.
