पिंप्री सार्वे येथील घरफोडी प्रकरणाचा छडा; आरोपीकडून ४.८२ लाखांचा ऐवज हस्तगत
पाचोरा (प्रतिनिधी) – पिंपळगाव हरेश्वर पोलीस ठाणे हद्दीतील पिंप्री सार्वे (ता. पाचोरा) येथे घरफोडीची दिनांक ७ एप्रिल २०२५ रोजी घटना घडली होती. आनंदराव विठ्ठल पाटील यांच्या घराच्या पत्र्याच्या खोलीतून अज्ञात चोरट्यांनी सुमारे ६ तोळे सोने चोरल्याची तक्रार दाखल करण्यात आली होती.
या प्रकरणी पिंपळगाव हरेश्वर पोलीस ठाण्यात भाग ५ गु. र. क्र. ८३/२०२५ भा.दं.वि. कलम ३०५ अंतर्गत गुन्हा दाखल करण्यात आला होता. सदर गुन्ह्याचा तपास पोलीस अधीक्षक . महेश्वर रेड्डी, अपर पोलीस अधीक्षक श्रीमती कविता नेरकर आणि उपविभागीय पोलीस अधिकारी धनंजय येरुळे यांच्या मार्गदर्शनाखाली सुरू करण्यात आला.
पोलीस निरीक्षक प्रकाश काळे यांच्या नेतृत्वाखाली पोलीस उपनिरीक्षक प्रकाश पाटील, पोहेकॉ नरेंद्र नरवाडे, पो.कॉ. अमोल पाटील, नामदेव इंगळे आणि इमरान पठाण यांच्या विशेष पथकाने राजेंद्र किसन पाटील (वय ४२, रा. पिंप्री सार्वे, ता. पाचोरा) याला ताब्यात घेऊन चौकशी केली असता त्याने गुन्ह्याची कबुली दिली. त्याच्याकडून चोरीस गेलेला मुद्देमाल जप्त करण्यात आला असून त्यामध्ये ५० ग्रॅम वजनाचे सोन्याचे कडे , १० ग्रॅम वजनाचा सोन्याचा नेकलेस. २ चांदीचे पैंजण असा एकूण सुमारे ४,८२,००० रुपये किंमतीचा ऐवज हस्तगत करण्यात आला आहे. पुढील तपास पोहेकॉ नरेंद्र नरवाडे करत आहेत.
