आवार येथील तरुणाचा मृतदेह वाळकी पायथ्यावर आढळला
चोपडा तालुका | वाळकी येथील तापी नदीच्या काठावर एका तरुणाचा मृतदेह आढळून आला आहे. मृत तरुणाची ओळख आवार (ता. जळगाव) येथील पवन कैलास सोनवणे (वय २३) म्हणून झाली असून, तो मतिमंद होता. प्रारंभिक माहितीनुसार, नदीत पाय घसरून पाण्यात बुडल्याने त्याचा मृत्यू झाला असण्याची शक्यता वर्तवली जात आहे.
ही घटना ८ जुलै रोजी उघडकीस आली. वाळकी गावातील ग्रामस्थांना तापी नदीच्या काठावर मृतदेह तरंगताना दिसून आला. यानंतर सामाजिक कार्यकर्ते भरत कोळी यांच्या माध्यमातून ग्रामस्थांनी पोलीस पाटलांना माहिती दिली आणि त्यांनी ग्रामीण पोलिसांना कळवले. पोलिसांनी तत्काळ घटनास्थळी धाव घेतली आणि मृतदेहाची ओळख पटवण्यासाठी प्रयत्न सुरू केले.
दरम्यान, मृत तरुणाचा फोटो सोशल मीडियावर व्हायरल झाल्यानंतर त्याची ओळख पटली. कुटुंबीयांपर्यंत माहिती पोहोचताच मृत तरुण हा आवार येथील पवन कैलास सोनवणे असल्याचे स्पष्ट झाले. तो ४ जुलै रोजी सकाळी शौचासाठी बाहेर पडला होता, मात्र परत आला नव्हता. नातेवाईकांनी शोध घेतला पण तो सापडला नव्हता. याबाबत जळगाव तालुका पोलीस ठाण्यात हरवल्याची नोंद करण्यात आली होती.
पोलिसांनी मृतदेहाचा पंचनामा करून पुढील तपास सुरू केला आहे.
