खडसेंचे जावई आणि महिला आमदाराच्या पतीसह ५ जणांना अटक, अंमली पदार्थ जप्त
खान्देश टाइम्स न्यूज l २७ जुलै २०२५ l पुण्यात अंमली पदार्थांचे रॅकेट पुन्हा चर्चेत असतानाच, खराडी परिसरातील एका उच्चभ्रू गेस्ट हाऊसमध्ये सुरू असलेल्या हाय-प्रोफाईल रेव्ह पार्टीवर पोलिसांनी मध्यरात्री छापा टाकला आहे. या कारवाईत ५ जणांना अटक करण्यात आली असून, त्यात राष्ट्रवादी काँग्रेस शरदचंद्र पवार पक्षाच्या महिला प्रदेशाध्यक्षा रोहिणी खडसे यांचे पती प्रांजल केवळकर (एकनाथ खडसेंचे जावई) आणि एका महिला आमदाराच्या पतीचा समावेश असल्याची प्राथमिक माहिती समोर आली आहे.
मिळालेल्या गुप्त माहितीनुसार, गुन्हे शाखेच्या पथकाने ‘स्टे बर्ड’ नावाच्या गेस्ट हाऊसवर छापा टाकला. रॅडीसन हॉटेलच्या मागे असलेल्या या गेस्ट हाऊसमध्ये मोठी रेव्ह पार्टी सुरू होती. पोलिसांनी जेव्हा छापा टाकला, तेव्हा मोठ्या आवाजात संगीत सुरू होते आणि उपस्थित लोक अंमली पदार्थांचे सेवन करत होते. पोलिसांनी सर्वांना रंगेहाथ पकडले.
या छाप्यात मोठ्या प्रमाणात अंमली पदार्थ, दारू आणि हुक्के जप्त करण्यात आले आहेत. अटक करण्यात आलेल्यांमध्ये दोन महिला आणि तीन पुरुषांचा समावेश आहे. पोलिसांनी जप्त केलेल्या अंमली पदार्थांचा स्रोत आणि पुरवठादार यांचा शोध घेण्यासाठी पुढील तपास सुरू केला आहे.
या प्रकरणात प्रसिद्ध बुकी निखिल पोपटानी याचेही नाव जोडले जात असल्याने राजकीय वर्तुळात खळबळ उडाली आहे. पुणे शहरातील अंमली पदार्थांचा वाढता वापर आणि अशा रेव्ह पार्ट्या यामुळे नागरिकांमध्ये चिंतेचे वातावरण निर्माण झाले आहे. या घटनेमुळे खराडी परिसरातील सुरक्षिततेचा प्रश्न पुन्हा ऐरणीवर आला आहे.
