यावल–चोपडा रस्त्यावर गांजाची मोठी तस्करी उघड; एक लाखाचा मुद्देमाल जप्त, तिघांविरुद्ध गुन्हा
यावल : शहराबाहेर चोपडा रस्त्यावर वन विभागाच्या कार्यालयासमोर पोलिसांनी केलेल्या कारवाईत गांजाची मोठी तस्करी उघड झाली आहे. या कारवाईत तब्बल ४ किलो ६० ग्रॅम गांजा जप्त करण्यात आला असून त्याची किंमत सुमारे १ लाख ९०० रुपये आहे. या प्रकरणी तिघांविरुद्ध गुन्हा दाखल करण्यात आला आहे.
गोपनीय माहितीवर कारवाई
फैजपूरचे डीवायएसपी अनिल बडगुजर आणि यावलचे पोलीस निरीक्षक रंगनाथ धारबळे यांना वाघझिरा येथून गांजा आणला जात असल्याची माहिती मिळाली होती. त्यानुसार २५ ऑगस्ट रोजी सकाळी ११ वाजता सहायक पोलीस निरीक्षक अजय वाढवे, उपनिरीक्षक अनिल महाजन, उपनिरीक्षक एम. जे. शेख यांच्यासह पथकाने यावल–चोपडा मार्गावर सापळा लावला.
दोन जण पकडले
या वेळी वाघझिरा गावाकडून संशयित दुचाकी (एमएच-१९-४११६) येताना दिसली. पथकाने त्यांना थांबवले असता युसूफ शहा मुलजार शहा (रा. मुस्लीम कॉलनी, भुसावळ) आणि युनूस सुलतान शेख (रा. गरीब नवाज भाग, भुसावळ; मूळ रा. मिठी खाडी निंबायत, सुरत, गुजरात) यांना पकडण्यात आले. तपासात त्यांच्या ताब्यातून ४ किलोपेक्षा अधिक गांजा आढळून आला.
तिसऱ्याचे नाव उघड
चौकशीत दोघांनी हा गांजा भामसिंग पुट्या बारेला (रा. वाघझिरा) याच्याकडून विकत घेतल्याचे सांगितले. त्यानुसार तिघांविरुद्ध यावल पोलिस ठाण्यात गुन्हा नोंदवण्यात आला आहे.
जप्त करण्यात आलेल्या गांजासह दुचाकी व साहित्य असा मुद्देमाल १ लाख ९०० रुपयांचा असल्याचे पोलिसांनी सांगितले. पुढील तपास सहायक फौजदार विजय पाचपोळे, हेड कॉन्स्टेबल रोहिल गणेश व पोलीस कॉन्स्टेबल वसीम तडवी करीत आहेत.
