जळगाव शहरातील मेहरूण तलावात बेपत्ता झालेल्या तरुणाचा मृतदेह आढळला
तांबापुरा परिसरात खळबळ ; घातपात झाल्याचा संशय
जळगाव प्रतिनिधी I तांबापुरा भागातून एक २१वर्षीय तरुण बेपत्ता झाल्याने त्याचा शोधाशोध सुरू असताना आज सकाळी मेहरूण तलावात बेपत्ता तरुणाचा मृतदेह आढळून आल्याची घटना ८ वाजेच्या सुमारास उघडकीस आली असून या घटनेनंतर तांबापुरा परिसरात खळबळ उडाली आहे. एमआयडीसी पोलिसांनी मृतदेह ताब्यात घेऊन शवविच्छेदनासाठी जिल्हा शासकीय आणि वैद्यकीय महाविद्यालयात पाठविला . याबाबत एमआयडीसी पोलीस स्टेशनला अकस्मात मृत्यूची नोंद करण्यात आली आहे . दरम्यान मयताच्या कुटुंबीयांनी तो दोन दिवसांपासून बेपत्ता असल्याने घात पात झाल्याचा संशय व्यक्त केला आहे,
शेख अबुझर शेख युनुस वय बिलाल चौक २१ रा. तांबापुरा जळगाव असे मयत तरुणाचे नाव असून तो बिलाल चौकातून १८ रोजी सायंकाळी ५ वाजेपासून बेपत्ता झाल्याने दोन दिवसांपासून त्याचे कुटुंबीय त्याचा शोध घेत होते. याबाबत शेख अबुझर याची एमआयडीसी पोलीस ठाण्यात हरविल्याची नोंद करण्यात आली होती .
आज सकाळी मच्छीमार असलेले जय सपकाळे यांना मेहरूण तलावात एक मृतदेह तरंगत असल्याचे आढळून आल्याने त्यांनी तत्काळ ही माहिती एमआयडीसी पोलिसांना दिली. घटनेची माहिती कळताच पोलिसांनी तत्काळ घटनास्थळी धाव घेऊन मृतदेह बाहेर काढून जिल्हा शासकीय वैद्यकीय महाविद्यालयात पाठविण्यात आला. यावेळी मृतक अबुझर याच्या नातेवाईकांनी रुग्णालय परिसरात एकच आक्रोश करून मोठ्या संख्येने गर्दी केली होती.
दरम्यान अबुझर याने आत्महत्या केली की त्याचा घातपात झाला अशी शंका उपस्थित केली जात आहे. दरम्यान या घटनेबाबत एमआयडीसी पोलिस स्टेशनला अकस्मात मृत्यूची नोंद करण्यात आली आहे.
