दरोड्याच्या तयारीत असलेल्या सात कुख्यात दरोडेखोरांना अटक
चोपडा शहर पोलिसांची मोठी कारवाई; गावठी पिस्तूल, तलवारीसह लाखो रुपयांचा मुद्देमाल जप्त
चोपडा: चोपडा शहर पोलिसांनी मोठी कारवाई करत दरोडा टाकण्याच्या उद्देशाने जमलेल्या सात सराईत गुन्हेगारांच्या टोळीला अटक केली आहे. या कारवाईत त्यांच्याकडून गावठी पिस्तूल, मॅगझीन, तलवारी तसेच चारचाकी वाहन असा एकूण १३ लाख १० हजार रुपयांचा मुद्देमाल हस्तगत करण्यात आला आहे.
पोलिसांनी दिलेल्या माहितीनुसार, मध्यरात्री २:३० वाजण्याच्या सुमारास चोपडा शहरातील शिरपूर बायपास रोडवरील रणगाडा चौकाजवळ एक संशयास्पद पांढऱ्या रंगाची स्विफ्ट डिझायर (MH-26 CH-1733) गाडी बराच वेळ थांबलेली असल्याची गुप्त माहिती चोपडा शहर पोलिसांना मिळाली.
पोलीस निरीक्षक मधुकर साळवे यांच्या नेतृत्वाखालील पथकाने तात्काळ घटनास्थळी धाव घेतली. संशयास्पद वाहनाजवळ पोलिसांना पाहताच पळून जाण्याचा प्रयत्न करणाऱ्या सातही संशयितांना पोलिसांनी मोठ्या शिताफीने वेढा घालून ताब्यात घेतले.
घातक शस्त्रांसह मुद्देमाल हस्तगत
संशयितांची आणि वाहनाची झडती घेतली असता, त्यांच्याकडून दोन लोडेड गावठी पिस्तुले, एक रिकामे मॅगझीन आणि दोन तलवारी जप्त करण्यात आल्या. तसेच, मोबाईल फोन, रोख रक्कम आणि दरोड्यासाठी वापरण्यात येणारे चारचाकी वाहन असा एकूण १३ लाख १० हजार रुपये किमतीचा मुद्देमाल पोलिसांनी हस्तगत केला.
अटक आरोपींवर गंभीर गुन्हे दाखल
अटक करण्यात आलेले सर्व आरोपी सराईत गुन्हेगार असून त्यांच्यावर विविध पोलीस ठाण्यांमध्ये खून, खुनाचा प्रयत्न, दरोडा, जबरी चोरी, दंगल, दहशत माजवणे आणि बेकायदा शस्त्र बाळगणे यासारखे गंभीर गुन्हे दाखल आहेत. यातील काही आरोपी नुकतेच कारागृहातून सुटले होते.
अटक करण्यात आलेल्या आरोपींमध्ये दिलीपसिंह हरिसिंह पवार (वय ३२, रा. नाथनगर, नांदेड),विक्रम बाळासाहेब बोरगे (वय २४, रा. वैजापूर, जि. संभाजीनगर,अनिकेत बालाजी सूर्यवंशी (वय २५, रा. नवामोंढा, नांदेड ,अमनदीपसिंह अवतारसिंह राठोड (वय २५, रा. मगनपूरा, नांदेड),सदामहुसेन मोहम्मद अमीन (वय ३३, रा. इतवारा, नांदेड,अक्षय रविंद्र महाले (वय ३०, रा. भावसार गल्ली, चोपडा ,जयेश राजेंद्र महाजन (वय ३०, रा. भाट गल्ली, चोपडा)यांचा समावेश आहे.
तपासात हे आरोपी शस्त्रसज्ज अवस्थेत रस्त्यावर दरोडा टाकून लूट करण्याच्या उद्देशाने एकत्र जमले होते, हे उघड झाले आहे. तसेच, हे आरोपी नांदेड परिसरात शस्त्रांचा धाक दाखवून खंडणी वसूल करणे आणि अपहरण करून व्हिडिओ बनवणे यांसारखी कृत्ये करून दहशत पसरवत होते, असेही समोर आले आहे.
गुन्हा दाखल, पुढील तपास सुरु
याप्रकरणी चोपडा शहर पोलिसांनी गु.र.नं. ५८१/२०२५ अंतर्गत भा.द.वि. कलम ३९९, ४०२ (दरोड्याच्या तयारीत असणे), शस्त्र अधिनियम १९५९ आणि महाराष्ट्र पोलीस कायद्यांतर्गत गुन्हा दाखल करून सर्व आरोपींना अटक केली आहे. आरोपींना न्यायालयात हजर करण्यात आले असून पुढील तपास पोलीस उपनिरीक्षक चेतन परदेशी करत आहेत.
पोलीस अधीक्षक महेश्वर रेड्डी, अपर पोलीस अधीक्षक कविता नेरकर आणि उपविभागीय अधिकारी अण्णासाहेब घोलप यांच्या मार्गदर्शनाखाली ही यशस्वी कारवाई पार पडली. कारवाईत पोलीस निरीक्षक मधुकर साळवे, सहाय्यक पोलीस निरीक्षक एकनाथ भिसे तसेच पोलीस कर्मचाऱ्यांनी सक्रिय सहभाग घेतला.
