धरणगाव हा शिवसेनेचा बालेकिल्ला होता, आहे आणि पुढेही राहील! – पालकमंत्री गुलाबराव पाटील

धरणगाव हा शिवसेनेचा बालेकिल्ला होता, आहे आणि पुढेही राहील! – पालकमंत्री गुलाबराव पाटील

नूतन पदाधिकाऱ्यांना नियुक्तिपत्रांचे वितरण; संघटना मजबूत करण्याचे आवाहन, शहर विकासासाठी निधी कमी पडू देणार नाही

धरणगाव, प्रतिनिधी : धरणगाव हा शिवसेनेचा बालेकिल्ला होता, आजही आहे आणि पुढेही राहील. हा बालेकिल्ला अधिक मजबूत करण्यासाठी प्रत्येक पदाधिकारी आणि शिवसैनिकाने एकजुटीने काम करावे. जनतेने १५ नगरसेवकांना निवडून दिले; मात्र नगराध्यक्षपद थोड्या मतांनी हुकले म्हणून खचून जाऊ नका. पराभवातून शिकून चुका सुधारा आणि नव्या ताकदीने पुन्हा उभे राहा. संघटना हीच शिवसेनेची खरी ताकद असून, मजबूत संघटनेच्या बळावरच सत्ता मिळते, असे प्रतिपादन पालकमंत्री तथा शिवसेनेचे ज्येष्ठ नेते गुलाबराव पाटील यांनी केले.

धरणगाव येथील डॉ. श्रीकांत शिंदे फाउंडेशन व शिवसेना कार्यालयात शहर शिवसेनेच्या नूतन कार्यकारिणीतील पदाधिकाऱ्यांना पालकमंत्री गुलाबराव पाटील यांच्या हस्ते नियुक्तिपत्रे प्रदान करण्यात आली. यावेळी त्यांनी नवनियुक्त पदाधिकाऱ्यांचे अभिनंदन करून त्यांना पुढील वाटचालीस शुभेच्छा दिल्या.

पदे मिरवण्यासाठी नव्हे, जनतेची कामे करण्यासाठी!

पालकमंत्री गुलाबराव पाटील म्हणाले की, पदे ही मिरवण्यासाठी नसून जनतेची कामे करण्यासाठी आहेत. सत्ता ही जनतेचे भले करण्याची संधी आहे. हिंदुहृदयसम्राट बाळासाहेब ठाकरे यांच्या ८० टक्के समाजकारण आणि २० टक्के राजकारण या विचारांनुसार प्रत्येकाने काम करावे. शिवसेनेचे मुख्य नेते तथा उपमुख्यमंत्री एकनाथ शिंदे यांच्या कार्याचा आदर्श घ्यावा.

प्रत्येक नगरसेवक आणि पदाधिकाऱ्याने आपल्या प्रभागातील नागरिकांच्या सतत संपर्कात राहावे. जुन्या व अनुभवी शिवसैनिकांचे मार्गदर्शन घ्यावे आणि दर महिन्याला संघटनात्मक बैठका आयोजित कराव्यात. जनतेच्या विश्वासाला पात्र ठरण्यासाठी प्रत्येकाने अधिक जोमाने काम करावे, असे आवाहन त्यांनी केले.

शहर विकासासाठी निधी कमी पडू देणार नाही

धरणगाव शहराच्या विकासासाठी आतापर्यंत निधीची कमतरता भासू दिली नाही आणि यापुढेही भासू देणार नाही, अशी ग्वाही पालकमंत्री पाटील यांनी दिली. दुष्काळाच्या संकटात जनतेच्या मदतीला धावून जाण्याचे आवाहन करताना जळगाव व धरणगाव तालुक्यांतील उर्वरित नाला खोलीकरणाची कामे फेब्रुवारीपर्यंत पूर्ण करण्याचा संकल्प असल्याचे त्यांनी सांगितले. पाणीटंचाई दूर करण्यासाठी प्रयत्न सुरू असल्याचेही त्यांनी स्पष्ट केले.

‘जिल्हाप्रमुख आपल्या दारी’ या उपक्रमाचे त्यांनी कौतुक केले. उर्वरित पदाधिकाऱ्यांच्या नियुक्त्या लवकरच जाहीर करण्यात येतील, अशी माहितीही त्यांनी दिली.

संघटनेची मजबूत फळी उभी करा – प्रतापराव पाटील

युवा नेते तथा माजी जिल्हा परिषद सदस्य प्रतापराव पाटील यांनी संघटना हीच शिवसेनेची खरी ताकद असल्याचे सांगितले. प्रत्येक पदाधिकाऱ्याने जबाबदारीने काम करून वरिष्ठांच्या मार्गदर्शनाखाली प्रभागनिहाय मजबूत संघटनात्मक फळी उभी करावी. नियमित बैठका आणि जनसंपर्कावर भर द्यावा. लवकरच पदाधिकाऱ्यांसाठी प्रशिक्षण वर्ग आयोजित करण्यात येणार आहेत. काम करताना चुका झाल्या तरी घाबरू नका, त्यातून शिकून पुढे जा. पालकमंत्री गुलाबराव पाटील आपल्या पाठीशी खंबीरपणे उभे आहेत, असा विश्वास त्यांनी व्यक्त केला.

जनतेच्या प्रश्नांना प्राधान्य द्या

शिवसेना जिल्हाप्रमुख विष्णू भंगाळे यांनी पक्षसंघटना अधिक बळकट करण्यासाठी सर्व पदाधिकाऱ्यांनी एकदिलाने काम करण्याचे आवाहन केले. जनतेच्या प्रश्नांना प्राधान्य देऊन प्रत्येक प्रभागात शिवसेनेची ताकद वाढवावी, असे ते म्हणाले. यावेळी तालुकाप्रमुख डी. ओ. पाटील आणि उपजिल्हाप्रमुख अॅड. शरद माळी यांनीही मनोगत व्यक्त केले.

नूतन पदाधिकाऱ्यांच्या नियुक्त्या

उपशहरप्रमुख : कमलेश भगवान बोरसे, सुरेश भास्कर महाजन, संतोष वाल्मीक महाजन, अहेमद नबुवतखां पठाण.

शहर संघटक : प्रभुदास रोहीदास जाधव.

उपशहर संघटक : गोविंदा सुनील मनोरे, किशोर साहेबराव पाटील.

शहर कार्याध्यक्ष : रवींद्र रमेश महाजन.

शहर उपकार्याध्यक्ष : सुदर्शन सुरेश भागवत.

शहर समन्वयक : नाना लोटन मराठे.

उपशहर समन्वयक : हेमराज चौधरी.

युवासेना शहरप्रमुख : कन्हैया महाजन.

मान्यवरांची उपस्थिती

कार्यक्रमाचे प्रास्ताविक शहरप्रमुख वीरेंद्र पुरभे यांनी केले. त्यांनी धरणगाव शहरातील शिवसेनेच्या संघटनात्मक वाटचालीची आणि सद्यस्थितीची माहिती दिली. सूत्रसंचालन विभागप्रमुख रवी महाजन यांनी केले, तर आभार माजी नगराध्यक्ष पी. एम. पाटील यांनी मानले.

यावेळी शिवसेना जिल्हाप्रमुख विष्णू भंगाळे, युवा नेते तथा माजी जिल्हा परिषद सदस्य प्रतापराव पाटील, युवासेना जिल्हाप्रमुख रोहित कोगटा, जळगाव महानगरप्रमुख गणेश सोनवणे, तालुकाप्रमुख डी. ओ. पाटील, शहरप्रमुख वीरेंद्र पुरभे, उपनगराध्यक्ष विजय महाजन, गटनेते पप्पू भावे, चर्मकार समाजाचे राष्ट्रीय अध्यक्ष भानुदासअप्पा विसावे, माजी नगराध्यक्ष पी. एम. पाटील, उपजिल्हाप्रमुख अॅड. शरद माळी, विलास महाजन, पवन महाजन, बाळू जाधव, वासुदेव चौधरी, मोतीअप्पा पाटील यांच्यासह शिवसेनेचे पदाधिकारी आणि शिवसैनिक मोठ्या संख्येने उपस्थित होते.