रिक्षाचालकाकडून देशी कट्टा व जिवंत काडतूस जप्त!
शनीपेठ पोलिसांची कारवाई; आरोपी गजाआड
जळगाव प्रतिनिधी
शहरातील सुरक्षेच्या पार्श्वभूमीवर पोलिसांनी गस्त आणि नाकाबंदी अधिक कडक केली असून, २८ मार्च रोजी शनीपेठ पोलिसांनी मोठी कारवाई केली. नेरी नाका येथे सापळा रचत एका रिक्षाचालकाला अडवून त्याच्याकडून देशी कट्टा आणि दोन जिवंत काडतुसे जप्त करण्यात आली.
पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते आणि उपविभागीय पोलीस अधिकारी संदीप गावीत यांच्या आदेशानुसार पोलिसांनी ही कारवाई केली. पोलिस निरीक्षक रंगनाथ धारबळे यांना मिळालेल्या गोपनीय माहितीनुसार, रिक्षाचालक राहुल रंगराव पाटील (वय ३२, रा. कुसुंबा, गणपतीनगर, जळगाव) हा MH19CW6108 क्रमांकाच्या रिक्षातून जळगावात येत असल्याची माहिती मिळाली.
त्यानुसार, पोलिसांनी नेरी नाका येथे सापळा लावून संशयित रिक्षा अडवली. तपासणी दरम्यान, ड्रायव्हर सीटखाली लपवून ठेवलेला देशी बनावटीचा कट्टा आणि मॅगझिनमध्ये दोन जिवंत काडतुसे जप्त करण्यात आली.
याप्रकरणी शनिपेठ पोलीस ठाण्यात गुन्हा क्रमांक ७३/२०२५ अन्वये भारतीय हत्यार कायदा कलम ३, २५ (१-बी)(अ) आणि महाराष्ट्र पोलीस अधिनियम कलम ३७ (१) चे उल्लंघन १३५ अंतर्गत गुन्हा दाखल करण्यात आला आहे.
ही कारवाई पोलीस निरीक्षक रंगनाथ धारबळे यांच्या मार्गदर्शनाखाली गुन्हे शोध पथकातील पोलीस नाईक किरण वानखेडे, पोलीस हवालदार विकी इंगळे आणि पोलीस हवालदार रविंद्र साबळे यांनी केली. आरोपीला २९ मार्च रोजी न्यायालयात हजर करण्यात येणार असून, पुढील तपास सहायक पोलीस निरीक्षक साजिद मन्सुरी करीत आहेत.
