महिला ग्राम महसूल अधिकार्‍यांचा विनयभंग; पोलीस पाटलाविरुद्ध गुन्हा दाखल
यावल (प्रतिनिधी) – यावल तालुक्यातील भोरटेक येथील पोलीस पाटील धनराज गोंडू कोळी याच्याविरुद्ध एका ३३ वर्षीय महिला ग्राम महसूल अधिकार्‍याने विनयभंगाचा गुन्हा दाखल केला असून, याप्रकरणी फैजपूर पोलीस ठाण्यात सोमवारी रात्री गुन्हा नोंदविण्यात आला आहे. संबंधित पोलीस पाटलाच्या निलंबनाचा प्रस्ताव तहसीलदारांनी प्रांत कार्यालयाकडे सादर केला आहे.
तक्रारीनुसार, १३ फेब्रुवारी २०२५ ते ७ एप्रिल २०२५ दरम्यान सदर अधिकारी या बामणोद ते अकलूद रस्त्यावर शासकीय कामानिमित्त प्रवास करत असताना पोलीस पाटील धनराज कोळी यांनी वारंवार त्यांचा पाठलाग केला. तसेच कार्यालयीन ठिकाणीही उपस्थित राहून त्यांच्या कामात अडथळा निर्माण केला आणि त्यांच्या मनाला लज्जा वाटेल, असे वर्तन केले.
महिला अधिकारी सतत होत असलेल्या या त्रासामुळे त्रस्त झाल्या होत्या. त्यांनी याबाबत वरिष्ठ अधिकाऱ्यांकडे तक्रार केली. प्रकरणाची गंभीर दखल घेत वरिष्ठांनी फैजपूर पोलीस ठाण्याला तात्काळ कारवाईचे आदेश दिले.
सदर प्रकरणी विनयभंगासह विविध कलमान्वये धनराज कोळी यांच्याविरुद्ध गुन्हा दाखल करण्यात आला आहे. या प्रकरणाचा तपास सहायक पोलीस निरीक्षक रामेश्वर मोताळे यांच्या मार्गदर्शनाखाली हवालदार मोती पवार करत आहेत.
