प्रेमविवाहाचा राग मनात धरून सेवानिवृत्त सीआरपीएफ अधिकाऱ्याने केला गोळीबार; मुलगी ठार, जावई गंभीर जखमी
चोपडा (प्रतिनिधी) शहरातील आंबेडकर नगर (खाई वाडा) परिसरात शनिवारी रात्री उशीरा प्रेमविवाहाच्या रागातून सेवानिवृत्त सीआरपीएफ अधिकाऱ्याने आपल्या मुलीवर आणि जावयावर गोळीबार केल्याची धक्कादायक घटना घडली. या घटनेत मुलगी तृप्ती अविनाश वाघ (२४) हिचा जागीच मृत्यू झाला, तर जावई अविनाश ईश्वर वाघ (२८) गंभीर जखमी झाला आहे. या घटनेमुळे चोपडा शहरात भीतीचे वातावरण पसरले आहे.
दोन वर्षांपूर्वी तृप्ती आणि अविनाश यांनी प्रेमविवाह केला होता, मात्र वडील किरण अर्जुन मंगले (४८, रा. शिरपूर, जि. धुळे) यांना हा विवाह मंजूर नव्हता. मनातील राग मनात ठेवत किरण मंगले यांनी चोपडा येथे आयोजित अविनाशच्या बहिणीच्या हळदीच्या कार्यक्रमात रात्रीच्या सुमारास थेट गोळीबार केला.
हळदीच्या कार्यक्रमात वऱ्हाडी आणि नातेवाईक मोठ्या संख्येने उपस्थित असताना अचानक गोळीबार सुरू झाला. किरण मंगले यांनी प्रथम आपल्या मुलीवर गोळी झाडली, ज्यात तृप्तीचा जागीच मृत्यू झाला. त्यानंतर जावई अविनाशवर गोळी झाडली, ज्यात तो गंभीर जखमी झाला.
घटनेनंतर संतप्त वऱ्हाड्यांनी आरोपी किरण मंगले यांना बेदम मारहाण केली. यामध्ये तेही गंभीर जखमी झाले. जखमी किरण मंगले आणि अविनाश वाघ यांना तातडीने चोपडा उपजिल्हा रुग्णालयात दाखल करण्यात आले आणि पुढील उपचारासाठी जळगाव येथे हलविण्यात आले.
घटनेची माहिती मिळताच पोलिस उपविभागीय अधिकारी अण्णासाहेब घोलप, पोलिस निरीक्षक मधुकर साळवे आणि पोलिस उपनिरीक्षक जितेंद्र वल्टे यांनी घटनास्थळी धाव घेतली. रुग्णालयात नातेवाईक आणि वऱ्हाड्यांची मोठी गर्दी झाली होती.
ही धक्कादायक घटना चोपडा शहरात भीती आणि खळबळीचे वातावरण निर्माण करून गेली आहे.
