जळगाव (दि. १० जुलै २०२५) / प्रतिनिधी – राज्याचे ग्रामविकास विभागाचे प्रधान सचिव एकनाथ डवले यांनी जळगाव जिल्ह्यातील गटविकास अधिकारी आणि सरपंचांशी व्हिडिओ कॉन्फरन्सिंगद्वारे थेट संवाद साधत घरकुल योजना आणि ग्रामीण विकास योजनांचा सखोल आढावा घेतला.
या संवादात त्यांनी जिल्ह्यासाठी मंजूर असलेल्या १ लाख ४० हजार घरकुलांच्या उद्दिष्टपूर्तीसाठी नियोजनबद्ध आणि तातडीच्या उपाययोजना करण्याचे स्पष्ट निर्देश दिले. घरकुल योजनेच्या अंमलबजावणीत कोणताही विलंब अथवा अडथळा होऊ नये, यासाठी प्रत्येक गटविकास अधिकाऱ्याने नियमित देखरेख, मार्गदर्शन व समन्वय ठेवावा, असे त्यांनी स्पष्ट केले.
मंगरूळ ग्रामपंचायतीच्या सरपंचांशी थेट संवाद
या बैठकीदरम्यान अमळनेर तालुक्यातील मंगरूळ गावाचे सरपंच श्री. समाधान पाटील यांच्याशी प्रधान सचिव डवले यांनी थेट संवाद साधला. त्यांनी गावातील घरकुल योजनेच्या प्रत्यक्ष अंमलबजावणीसंदर्भात माहिती घेतली आणि स्थानिक अडचणी व गरजांनुसार त्वरित उपाययोजना राबवण्याचे निर्देश दिले.
वरिष्ठ अधिकाऱ्यांची उपस्थिती
या व्हिडिओ बैठकीस प्रभारी मुख्य कार्यकारी अधिकारी रणधीर सोमवंशी, जिल्हा ग्रामीण विकास यंत्रणेचे प्रकल्प संचालक आर. एस. लोखंडे, तसेच इतर वरिष्ठ अधिकारी उपस्थित होते.
‘तुरळक नव्हे, ठोस कृतीची गरज’ – डवले
घरकुल योजनेसह इतर ग्रामीण विकास योजनांच्या प्रभावी अंमलबजावणीसाठी ग्रामपंचायती व जिल्हा प्रशासन यांच्यातील प्रभावी समन्वय अत्यावश्यक असल्याचे मत डवले यांनी व्यक्त केले. “उद्दिष्टपूर्ती ही केवळ कागदावर न राहता, ती जमिनीवर दिसली पाहिजे. प्रत्येक गटाने आता ठोस कृती उचलावी,” असे स्पष्ट शब्दांत त्यांनी सांगितले.
