हातात तलवार घेऊन दहशत माजवणारा जेरबंद !
स्थानिक गुन्हे शाखेची कारवाई, आरोपीवर यापूर्वी दोन गुन्हे दाखल
जळगाव (प्रतिनिधी) : जळगाव शहरातील सम्राट कॉलनी परिसरात तलवार घेऊन दहशत माजवणाऱ्या एका तरुणाला स्थानिक गुन्हे शाखेच्या पथकाने अटक केली आहे. धीरज दत्ता हिवराळे (वय २२, रा. सम्राट कॉलनी, जळगाव) असे अटक करण्यात आलेल्या इसमाचे नाव आहे. या तरुणाविरुद्ध यापूर्वीही दोन गंभीर स्वरूपाचे गुन्हे दाखल आहेत.
आज सायंकाळी ५.३० वाजेच्या सुमारास मा. वरिष्ठ पोलीस निरीक्षक श्री. संदीप पाटील यांना मिळालेल्या गोपनीय माहितीनुसार, सम्राट कॉलनीतील परिसरात एक इसम हातात तलवार घेऊन आरडाओरड करत दहशत निर्माण करत असल्याची माहिती मिळाली. त्यानुसार स्थानिक गुन्हे शाखेच्या पथकाने तत्काळ धाव घेतली असता, हिवराळे हा तलवार घेऊन नागरिकांमध्ये भीती पसरवत असताना आढळून आला. त्याला ताब्यात घेऊन एमआयडीसी पोलीस ठाण्यात त्याच्याविरुद्ध गुन्हा दाखल करण्यात आला आहे.
ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी संदीप गावित यांच्या मार्गदर्शनाखाली वरिष्ठ पोलीस निरीक्षक संदीप पाटील, पोलीस उपनिरीक्षक शरद बागल, सफौ. अतुल वंजारी, पोहेकॉ. प्रविण भालेराव, अक्रम शेख, विजय पाटील, हरीलाल पाटील, किशोर पाटील, प्रदीप चवरे आणि रविंद्र कापडणे यांनी केली.
