मुकुंद नगर घरफोडी प्रकरण उघडकीस : चांदीचा ऐवज हस्तगत ; दोघे चोरटे जेरबंद
जळगाव (प्रतिनिधी) – शहरातील मुकुंद नगर भागात पुण्याला गेलेल्या नागरिकाच्या बंद घरात चोरी करून ६१ हजार ५०० रुपयांचा चांदीचा ऐवज लंपास करणाऱ्या दोघा संशयित चोरट्यांना एमआयडीसी पोलिसांनी अवघ्या ४८ तासांत अटक करत संपूर्ण मुद्देमाल हस्तगत केला. या कारवाईमुळे परिसरात घडलेल्या घरफोडी प्रकरणावर पोलिसांनी यशस्वी पडदा टाकला आहे.
अरुण लक्ष्मण शेटे (वय ६४, रा. मुकुंद नगर, लाठी शाळेच्या मागे) हे २७ जून रोजी पुण्याला मुलाकडे गेले होते. ११ जुलै रोजी परत येण्याच्या आधी त्यांच्या शेजाऱ्यांनी घराची खिडकी आणि दरवाजा वाकलेले असल्याची माहिती दिली. घरी आल्यानंतर त्यांनी पाहणी केली असता देवघरातील चांदीचे मुकुट, महादेवाच्या पिंडीवरील अलंकार, चांदीच्या मूर्ती व अन्य साहित्य असा एकूण ६१ हजार ५०० रुपयांचा ऐवज चोरीस गेल्याचे लक्षात आले. त्यांनी तत्काळ एमआयडीसी पोलीस ठाण्यात तक्रार दाखल केली.
तपासाची सूत्रे पोलीस निरीक्षक बबन आव्हाड यांच्या मार्गदर्शनाखाली उपनिरीक्षक चंद्रकांत धनके व त्यांच्या पथकाने हाती घेतली. पथकाने घटनास्थळासह परिसरातील सीसीटीव्ही फुटेज तपासले असता दोन संशयित तरुण त्यात कैद झाल्याचे आढळले. त्या आधारे पोलिसांनी शाकीब शेख ताजुद्दीन शेख (वय २४, रा. कासमवाडी) आणि राहुल शेख रावळकर (वय ३२, रा. जाखनीनगर) या दोघांना ताब्यात घेतले.
तपासादरम्यान पोलिसांनी जेव्हा चौकशीची कडक भूमिका घेतली, तेव्हा त्यांनी चोरीची कबुली दिली. त्यांच्याकडून चोरलेला संपूर्ण चांदीचा ऐवज जप्त करण्यात आला. दोघांविरोधात एमआयडीसी पोलीस ठाण्यात गुन्हा दाखल करण्यात आला असून न्यायालयात हजर करण्यात येणार आहे. या गुन्ह्यात इतर कोणी सहभागी आहे का, याबाबत पोलीस तपास सुरू असल्याचेही सूत्रांनी सांगितले.
