सलोख्याचे दर्शन: जळगावात ईद-ए-मिलादचा जुलूस आता ८ सप्टेंबरला
सुन्नी मुस्लिम समाजाचे पोलीस अधीक्षकांना निर्णयाचे निवेदन सादर
जळगाव: जळगावच्या सुन्नी मुस्लिम समाजाने गणेश विसर्जनाच्या आदल्या दिवशी होणारा ईद-ए-मिलाद उन नबीचा जुलूस (मिरवणूक) पुढे ढकलण्याचा ऐतिहासिक निर्णय घेतला आहे. ५ सप्टेंबर रोजी होणारी ही मिरवणूक आता ८ सप्टेंबर रोजी काढण्यात येणार आहे. दोन्ही समाजांचे सण एकाच वेळी आल्यामुळे कोणताही अनुचित प्रकार घडू नये आणि हिंदू बांधवांना त्यांचा गणेशोत्सव शांततेत साजरा करता यावा, यासाठी हा निर्णय घेण्यात आला आहे.
यंदा मुस्लिम बांधवांचा पवित्र सण ईद-ए-मिलाद ५ सप्टेंबर (शुक्रवार) रोजी आहे, तर दुसऱ्याच दिवशी ६ सप्टेंबर (शनिवार) रोजी गणेश विसर्जन आहे. दोन्ही समाजांचे लोक आपापल्या मिरवणुका मोठ्या उत्साहात काढतात. या दोन्ही मिरवणुका एकाच वेळी निघाल्या तर कायदा आणि सुव्यवस्थेचा प्रश्न निर्माण होऊ शकतो, तसेच पोलिसांवरही मोठा ताण येऊ शकतो.
ही बाब लक्षात घेऊन, जळगावच्या सुन्नी मुस्लिम समाजाने मरकझी सुन्नी जामा मस्जिद भिलपुरा येथे झालेल्या बैठकीत ईद-ए-मिलादचा जुलूस ५ सप्टेंबरऐवजी ८ सप्टेंबर (सोमवार) रोजी काढण्याचा निर्णय घेतला आहे. हा निर्णय संपूर्ण महाराष्ट्रात घेण्यात आल्याचेही जाहीर करण्यात आले. या निर्णयामुळे हिंदू बांधवांना त्यांचा सण आनंदात साजरा करता येईल, तसेच प्रशासनालाही नियोजनासाठी पुरेसा वेळ मिळेल.
या निर्णयाची माहिती देण्यासाठी मरकझी जुलूस कमिटीने जिल्हा पोलीस अधीक्षक डॉ. महेश्वर रेड्डी यांना एक निवेदन सादर केले. यावेळी कमिटीचे अध्यक्ष सै. अयाज अली नियाज अली, सय्यद जावेद, जावेद इमाम, सय्यद उमर, अमान बिलाल, शेख रईस, शेख शफी आणि अयान अलीम यांच्यासह इतर सदस्य उपस्थित होते. या सलोख्याच्या निर्णयामुळे दोन्ही समाजांत एकतेचा आणि सौहार्दाचा संदेश पोहोचला आहे.
