‘लिफ्ट’ देण्याच्या बहाण्याने लूटमार करणारे दोन चोरटे जेरबंद
गुन्ह्यात वापरलेली कार जप्त ; एमआयडीसी पोलिसांची कारवाई
जळगाव: प्रवाशांना लिफ्ट देण्याच्या बहाण्याने त्यांच्याकडील मोबाईल आणि रोख रक्कम चोरणाऱ्या दोन सराईत चोरट्यांना एमआयडीसी पोलिसांनी अटक केली आहे. पोलिसांनी त्यांच्याकडून चोरीचा मुद्देमाल आणि गुन्ह्यात वापरलेली सुमारे ५ लाख रुपये किमतीची चारचाकी गाडीही जप्त केली आहे.
२५ ऑगस्ट रोजी दुपारी साडेबारा वाजता एक व्यक्ती धुळ्याला जाण्यासाठी अजिंठा चौकात बसची वाट पाहत होता. त्यावेळी एका मारुती अर्टिगा गाडीतील काही लोकांनी त्याला ‘कुठे जायचे’ असे विचारले. त्या व्यक्तीने धुळे येथे जायचे सांगितल्यावर, ‘आम्ही तुला सोडून देतो,’ असे सांगून त्यांनी त्याचा विश्वास संपादन केला.
त्या गाडीत आधीच इतर प्रवासी बसले असल्याचे भासवून त्याला पुढील सीटवर दाटीवाटीने बसवले. थोडे पुढे गेल्यावर गाडीत जागा नाही असे सांगून त्याला खाली उतरवले. खाली उतरल्यावर त्या व्यक्तीने खिशात पाहिले असता, त्याचा मोबाईल आणि २२,५०० रुपयांची रोख रक्कम चोरीला गेल्याचे त्याच्या लक्षात आले. त्याने तात्काळ एमआयडीसी पोलीस स्टेशन गाठून तक्रार दाखल केली.
पोलीस निरीक्षक बबन आव्हाड यांनी तात्काळ गुन्हे शोध पथकाला तपास करण्याचे आदेश दिले. उपनिरीक्षक राहुल तायडे आणि चंद्रकांत धनके यांच्या पथकाने तातडीने घटनास्थळावरील सीसीटीव्ही फुटेज तपासले. नेत्रम विभागाच्या मदतीने आरोपींच्या गाडीचा शोध घेण्यात आला. गोपनीय माहितीच्या आधारे पोलिसांनी नशिराबाद येथे सापळा रचून संशयित आरोपी वसिम अजमल खान (वय ३५) आणि जाफर उल्ला कहुल्ला कासार (वय ४२) यांना ताब्यात घेतले.
पोलिसांनी केलेल्या सखोल चौकशीत त्यांनी गुन्ह्याची कबुली दिली. त्यांनी त्यांच्या इतर दोन साथीदारांच्या मदतीने हा गुन्हा केल्याचे सांगितले. पोलिसांनी त्यांच्याकडून चोरीला गेलेला मोबाईल आणि २२,५०० रुपयांची रोकड जप्त केली. तसेच, गुन्ह्यासाठी वापरलेली सुमारे ५ लाख रुपये किमतीची मारुती अर्टिगा कारही पोलिसांनी हस्तगत केली आहे.
दोन्ही आरोपींना अटक करून त्यांना न्यायालयात हजर करण्यात आले. न्यायालयाने त्यांना दोन दिवसांची पोलीस कोठडी सुनावली आहे. या आरोपींवर यापूर्वीही अनेक गुन्हे दाखल आहेत. पोलीस नाईक प्रदीप चौधरी हे पुढील तपास करत आहेत.
ही कारवाई पोलीस अधीक्षक महेश्वर रेड्डी, अपर पोलीस अधीक्षक अशोक नखाते आणि पोलीस उप अधीक्षक नितीन गणापुरे यांच्या मार्गदर्शनाखाली करण्यात आली आहे.
