महिला डॉक्टरशी गैरवर्तन करणाऱ्या मुख्य वैद्यकीय अधिकाऱ्याला अटक
जळगाव महापालिका क्षेत्रात खळबळ
जळगाव (प्रतिनिधी) : महापालिकेचे मुख्य वैद्यकीय अधिकारी डॉ. विजय घोलप यांना सहकारी महिला डॉक्टरशी गैरवर्तन व शरीरसुखाची मागणी केल्याच्या गंभीर आरोपांवरून रविवारी (दि. २१ सप्टेंबर) दुपारी शहर पोलिसांनी अटक केली. या प्रकरणामुळे मोठी खळबळ उडाली आहे.
३८ वर्षीय महिला डॉक्टरने शहर पोलिस ठाण्यात दिलेल्या फिर्यादीत, “कर्तव्य बजावत असताना डॉ. घोलप यांनी घाणेरडे इशारे केले, मनाला लज्जा उत्पन्न होईल असे वर्तन केले व माझ्या इच्छेविरुद्ध शरीरसुखाची मागणी करत विनयभंग केला,” असे नमूद केले आहे. ही घटना शाहू महाराज रुग्णालयातील प्रमुख वैद्यकीय अधिकाऱ्यांच्या कक्षात घडल्याचे फिर्यादीत म्हटले आहे. त्यावरून पोलिसांनी तत्काळ गुन्हा दाखल करून डॉ. घोलप यांना अटक केली.
दरम्यान, महापालिका आयुक्त ज्ञानेश्वर ढेरे यांनी डॉ. घोलप यांना तत्काळ निलंबित करण्याचे आदेश काढले. याआधीच त्यांच्यावर अनेक तक्रारी दाखल झाल्या होत्या. जन्म-मृत्यू नोंदणी विभागातही त्यांच्या कारकिर्दीत गैरप्रकार उघड झाले होते. मुख्यमंत्री कार्य प्रशिक्षण योजनेत नियुक्त केलेल्या महिलेच्या जागी तिचा पती कर्तव्य बजावत असल्याचा प्रकार समोर आल्यानंतर चौकशी समितीने आयुक्तांना अहवाल दिला होता.
तक्रारींचा गांभीर्याने विचार करून व विशाखा समितीच्या प्राथमिक अहवालानंतर आयुक्त ढेरे यांनी डॉ. घोलप यांना दोषी ठरवले आणि अखेर त्यांच्या निलंबनाचे आदेश जारी केले.
