जळगावात दुचाकी चोर पकडला: चार वाहने जप्त
एलसीबी पथकाची कारवाई
जळगाव शहरात दुचाकी चोरीच्या वाढत्या घटनांवर अंकुश ठेवण्यासाठी पोलीस अधीक्षक डॉ. महेश्वर रेड्डी यांच्या निर्देशानुसार स्थानिक गुन्हे शाखेने (एलसीबी) प्रभावी पाऊल उचलले आहे. गोलाणी मार्केट परिसरात एका चोरीच्या प्रकरणाचा तपास करताना पथकाने चार गुन्हे उघडकीस आणले. संशयित विक्रम चव्हाण (रा. वसंतवाडी) याला अटक करण्यात आली असून, त्याच्याकडून चार चोरीच्या मोटारसायकली हस्तगत करण्यात आल्या आहेत.
जळगाव शहर पोलीस ठाण्यात यावर्षी नोंद झालेल्या एका दुचाकी चोरी प्रकरणाच्या तपासादरम्यान स्थानिक गुन्हे शाखेला गोपनीय माहिती मिळाली. सूत्रांनुसार, विक्रम भिका चव्हाण हा चोरीच्या दुचाकींचा वापर करत असल्याचे समजले. या माहितीच्या आधारे पथकाने वसंतवाडी येथे त्याच्या घरी जाऊन त्याला ताब्यात घेतले. कठोर चौकशीत त्याने चार चोऱ्यांची कबुली दिली.
हस्तगत वाहनांचा तपशील
संशयिताच्या माहितीवरून पोलिसांनी चार मोटारसायकली जप्त केल्या. यामध्ये जळगाव शहर पोलीस ठाण्यातील गुन्ह्यांशी संबंधित हिरो होंडा स्प्लेंडर (MH१९DU८२३५), होंडा शाईन (MH१९EC३९६८), हिरो होंडा स्प्लेंडर प्रो (MH१९BB६००५) आणि जिल्हापेठ पोलीस ठाण्यातील गुन्ह्यातील होंडा शाईन (MH२०FQ९७२८) यांचा समावेश आहे. या वाहनांची चोरी केल्याचे आरोपीने मान्य केले असून, ती पोलिसांनी ताब्यात घेतली आहेत. आरोपीला पुढील कारवाईसाठी जळगाव शहर पोलीस ठाण्याकडे सोपवण्यात आले आहे.
यांनी केली कारवाई
ही कारवाई पोलीस अधीक्षक डॉ. महेश्वर रेड्डी आणि अपर पोलीस अधीक्षक कविता नेरकर यांच्या मार्गदर्शनाखाली झाली. स्थानिक गुन्हे शाखेचे पोलीस निरीक्षक बबन आव्हाड यांच्या नेतृत्वाखालील पथकात पोलीस उपनिरीक्षक दत्तात्रय पोटे, सफौ विजयसिंग पाटील, अतुल वंजारी, हवालदार अकरम शेख, विजय पाटील, हरिलाल पाटील आणि प्रवीण भालेराव यांनी सहभाग घेतला.
या कारवाईने जळगाव शहरातील दुचाकी चोरीच्या समस्येवर काही प्रमाणात नियंत्रण मिळेल, असा विश्वास व्यक्त होत आहे. पोलीस अधीक्षकांच्या सक्रिय सूचनांमुळे तपास प्रक्रिया जलद झाली असून, यामुळे नागरिकांमध्ये सुरक्षेची भावना वाढण्यास मदत होईल, असे मानले जात आहे.
