कुसुंबा गावात ३७ वर्षीय तरुणाची आत्महत्या; गळफास घेत आयुष्य संपवले
जळगाव (प्रतिनिधी): तालुक्यातील कुसुंबा गावात एका ३७ वर्षीय तरुणाने राहत्या घरात गळफास लावून आत्महत्या केल्याची घटना सोमवारी (७ जुलै) दुपारी ३ वाजेच्या सुमारास उघडकीस आली. या प्रकरणी सायंकाळी एमआयडीसी पोलीस ठाण्यात अकस्मात मृत्यूची नोंद करण्यात आली आहे.
मृत तरुणाचे नाव विशाल परशूराम पाटील (वय ३७, रा. कुसुंबा, ता. व जि. जळगाव) असे आहे. विशाल पाटील हे कुटुंबीयांसह कुसुंबा येथे राहत होते. सोमवारी दुपारी त्यांनी राहत्या घरात गळफास घेऊन आयुष्य संपवले. आत्महत्येमागचे नेमके कारण अद्याप समोर आलेले नाही.
दुपारी ३ वाजता ही घटना उघडकीस आल्यानंतर, त्यांच्या नातेवाईक राहूल पाटील आणि गावातील काही ग्रामस्थांनी तत्काळ धाव घेऊन त्यांना खाली उतरवले आणि तातडीने शासकीय वैद्यकीय महाविद्यालयात दाखल केले. मात्र, वैद्यकीय अधिकाऱ्यांनी त्यांना मृत घोषित केले.
या दुर्दैवी घटनेमुळे कुसुंबा गावात शोककळा पसरली आहे. एमआयडीसी पोलिसांनी घटनास्थळी पंचनामा केला असून, पुढील तपास पोलीस हेडकॉन्स्टेबल गफुर तडवी यांच्या मार्गदर्शनाखाली सुरू आहे.
