जळगाव-भुसावळ मार्गे थेट तिरुपती-हिसार विशेष ट्रेन सुरू; जाणून घ्या वेळापत्रक, थांबे आणि सुविधा
जळगाव (प्रतिनिधी) – तिरुपती बालाजी हे देशातील सर्वात प्रसिद्ध धार्मिक स्थळांपैकी एक मानले जाते. दरवर्षी लाखो भाविक दर्शनासाठी तिरुपतीला गर्दी करतात. मात्र खानदेशातील भाविकांना थेट तिरुपतीला जाण्यासाठी थेट रेल्वे सेवा उपलब्ध नव्हती. ही गरज ओळखून रेल्वे प्रशासनाने एक महत्त्वपूर्ण निर्णय घेत तिरुपती-हिसार विशेष गाडी सुरु केली आहे.
गाडी क्रमांक ०७७१७ आणि ०७७१८ साप्ताहिक विशेष सेवा
रेल्वे मंत्रालयाने जुलै ते सप्टेंबर २०२५ दरम्यान साप्ताहिक विशेष गाडी सेवा सुरू केली आहे.
गाडी क्रमांक ०७७१७ तिरुपतीहून बुधवारी रात्री ११.४५ वाजता सुटून शनिवारी दुपारी २.०५ वाजता हिसारला पोहोचेल.
गाडी क्रमांक ०७७१८ हिसारहून रविवारी रात्री ११.१५ वाजता सुटून बुधवारी सकाळी ११.३० वाजता तिरुपतीला पोहोचेल.
ही सेवा ९ जुलै ते २४ सप्टेंबर आणि १३ जुलै ते २८ सप्टेंबर २०२५ या कालावधीत सुरू राहणार आहे.
महत्त्वाचे थांबे – खानदेशातील प्रवाशांना मोठा दिलासा
ही विशेष ट्रेन रेनिगुंटा, कड्डूपा, गुत्ती, कुर्नूल, महबूबनगर, काचीगुडा, निजामाबाद, नांदेड, अकोला, भुसावळ, जळगाव, नंदुरबार, वडोदरा, अजमेर, सीकर, झुंझुनू, लोहारू, सादुलपूर आदी स्थानकांवर थांबेल. त्यामुळे खानदेशातील प्रवाशांसाठी ही सेवा अतिशय उपयुक्त ठरणार आहे.
२२ डब्यांची ट्रेन – विविध प्रवासी वर्गांसाठी सोय
या विशेष ट्रेनमध्ये एकूण २२ डबे असतील, ज्यात जनरल, स्लीपर आणि वातानुकूलित (AC) डब्यांचा समावेश आहे. त्यामुळे प्रवास अधिक आरामदायक आणि सुरक्षित होईल.
खानदेशातील भाविकांसाठी सुवर्णसंधी
जळगाव, भुसावळ, चोपडा, यावल, एरंडोल, पाचोरा, भडगाव आदी भागांतील हजारो भाविक दरवर्षी तिरुपती बालाजीच्या दर्शनासाठी प्रवास करतात. त्यांच्यासाठी ही ट्रेन थेट सेवा म्हणजे एक सुवर्णसंधी ठरणार आहे.
रेल्वे प्रशासनाचा स्वागतार्ह निर्णय
भाविकांच्या गरजा ओळखून रेल्वे प्रशासनाने उचललेले हे पाऊल अभिनंदनीय असून, भविष्यातही ही सेवा नियमित सुरू ठेवावी, अशी स्थानिकांची अपेक्षा आहे.
