अज्ञात वाहनाने तरुणाला उडविले ; सुप्रीम कॉलनी जवळील घटना
जळगाव I प्रतिनिधी सुप्रीम कॉलनीजवळील राष्ट्रीय महामार्गावर मंगळवारी (२३ सप्टेंबर) सकाळी १०:३० वाजता एका भरधाव वाहनाने दिलेल्या धडकेत १८ वर्षीय दुचाकीस्वाराचा दुर्दैवी मृत्यू झाला. प्रेम उर्फ जयपाल चरणसिंग पाटील (रा. लोंढरी, ता. जामनेर, ह.मु. वाळूज, छ. संभाजीनगर) असे मृत तरुणाचे नाव आहे.
नुकतेच बारावी उत्तीर्ण झालेल्या जयपालचे भविष्य उज्ज्वल होते. मंगळवारी सकाळी तो पेट्रोल भरण्यासाठी घराबाहेर पडला होता. मात्र, राष्ट्रीय महामार्गावर एका भरधाव वाहनाने त्याच्या दुचाकीला जोरदार धडक दिली. या भीषण अपघातात जयपाल गंभीर जखमी झाला. त्याला तातडीने शासकीय वैद्यकीय महाविद्यालयात दाखल करण्यात आले, पण उपचारादरम्यान दुपारी त्याची प्राणज्योत मालवली.
जयपाल हा पाटील कुटुंबाचा एकुलता एक मुलगा होता. त्याच्या अकस्मात जाण्याने कुटुंबीयांवर शोककळा पसरली आहे. या घटनेने परिसरातही हळहळ व्यक्त होत आहे. एमआयडीसी पोलिसांनी याप्रकरणी अकस्मात मृत्यूची नोंद करून तपास सुरू केला आहे.
