कै. डी. एस. खिमाणी मॅडम यांना अभिवादनाने रोझलँडमध्ये नव्या शैक्षणिक वर्षाची सुरुवात
जळगाव (प्रतिनिधी) : न्यू इरा एज्युकेशन सोसायटी संचलित रोझलँड इंग्लिश मिडियम हायस्कूल व रोझलँड प्राथमिक विद्यामंदिरात संस्थापिका व प्रेरणास्त्रोत आदरणीय कै. डी. एस. खिमाणी मॅडम यांच्या स्मृतिदिनानिमित्त अभिवादन करून नव्या शैक्षणिक वर्षाची उत्साहपूर्ण वातावरणात सुरुवात करण्यात आली.
कार्यक्रमाच्या प्रारंभी कै. डी. एस. खिमाणी मॅडम यांच्या प्रतिमेचे व प्रेरणास्थळाचे पूजन करण्यात आले. मराठी व इंग्रजी माध्यमातील विद्यार्थी-विद्यार्थिनींनी पुष्पहार अर्पण करून त्यांना आदरांजली वाहिली. तसेच शिक्षक, शिक्षकेतर कर्मचारी आणि विद्यार्थ्यांनी पुष्पांजली अर्पण करत वृक्षारोपणाद्वारे त्यांच्या पवित्र स्मृतींना अभिवादन केले.
यावेळी मान्यवरांनी कै. खिमाणी मॅडम यांच्या शैक्षणिक कार्याचा गौरव करताना, त्यांनी रुजविलेल्या शिक्षण, शिस्त आणि संस्कारांच्या परंपरेचा वारसा जपणे हीच त्यांना खरी श्रद्धांजली ठरेल, असे मत व्यक्त केले.
यानंतर प्री-प्रायमरी व प्रायमरी विभागातील विद्यार्थ्यांचे पुष्पगुच्छ, स्वागतगीत आणि विविध उपक्रमांद्वारे उत्साहात स्वागत करण्यात आले. फुले, फुगे आणि आकर्षक हस्तकला सजावटीमुळे शाळेचा परिसर आनंदी वातावरणाने फुलून गेला होता. नव्या वर्गाची, नवीन मित्रांची आणि शाळेची उत्सुकता विद्यार्थ्यांच्या चेहऱ्यावर स्पष्टपणे दिसून येत होती.
नवागत विद्यार्थ्यांसाठी विशेष खाऊचे आयोजन करण्यात आले होते. या उपक्रमामुळे विद्यार्थ्यांचा शाळेच्या पहिल्याच दिवशीचा आनंद द्विगुणित झाला.
कार्यक्रमाला रोझलँड प्राथमिक विद्यामंदिराचे मुख्याध्यापक, इंग्रजी व मराठी माध्यमांतील शिक्षक-शिक्षिका, शिक्षकेतर कर्मचारी तसेच विद्यार्थी मोठ्या संख्येने उपस्थित होते.
नव्या शैक्षणिक वर्षात विद्यार्थ्यांनी गुणवत्तापूर्ण शिक्षणासोबतच उत्तम संस्कार आत्मसात करून सर्वांगीण प्रगती साधावी, असा संदेश यावेळी देण्यात आला. शिक्षक, शिक्षकेतर कर्मचारी आणि विद्यार्थ्यांच्या उत्स्फूर्त सहभागामुळे कार्यक्रम यशस्वीरीत्या पार पडला.
उपशीर्षक : संस्थापिकेच्या स्मृतिदिनी श्रद्धांजली; विद्यार्थ्यांच्या उत्साही स्वागताने शैक्षणिक वर्षाचा शुभारंभ
