चाळीसगावात अवैध गुटख्याची मोठी कारवाई; टेम्पोसह ६.८३ लाखांचा मुद्देमाल जप्त
चाळीसगाव : शासनाने प्रतिबंधित केलेल्या गुटखा, पान मसाला आणि इतर अन्नपदार्थांची अवैध वाहतूक करणारा टेम्पो चाळीसगाव शहर पोलिसांनी नागद रोडवर पकडला. या कारवाईत तब्बल ६ लाख ८३ हजार २४४ रुपयांचा मुद्देमाल जप्त करण्यात आला आहे.
शहर पोलिसांना मिळालेल्या गुप्त माहितीनुसार, नागद रोडवरील अवि रेखा पेट्रोल पंपाजवळ संशयित टेम्पो (क्र. एमएच १९ सीवाय ६६५२) थांबवून तपासणी करण्यात आली. त्यावेळी टेम्पोत प्रतिबंधित सुगंधित पान मसाला, ‘कुरकुरे’, ‘पोंगा पंडित’ यांसारख्या अन्नपदार्थांचा साठा आढळून आला. पोलिसांनी तात्काळ टेम्पोसह सर्व माल जप्त केला.
जप्त मालाचा पंचनामा अन्न व औषध प्रशासन, जळगाव विभागाचे अधिकारी शरद मधुकर पवार आणि श्रेणी कैलास पाटील यांच्या उपस्थितीत करण्यात आला.
या प्रकरणी चाळीसगाव शहर पोलिस ठाण्यात गुन्हा दाखल करण्यात आला असून, पुढील तपास सुरू आहे. ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक कविता नेरकर आणि उपविभागीय पोलीस अधिकारी ठाकुरवाड यांच्या मार्गदर्शनाखाली पोलीस निरीक्षक अमितकुमार मनेळ यांच्या पथकाने केली. या पथकात पोलीस उपनिरीक्षक संदीप घुले आणि इतर कर्मचारी सहभागी होते. गुन्ह्याचा तपास सहायक पोलीस निरीक्षक भारत चौधरी करीत आहेत.
