जळगाव (प्रतिनिधी) – शहरात गणेशोत्सवाचा उत्साह शिगेला पोहोचला असताना, जळगावमधील भिलपुरा चौक येथे हिंदू-मुस्लिम ऐक्याचे अनोखे दर्शन घडले. दरवर्षीप्रमाणे यंदाही सै. नियाज अली भैय्या फॉउंडेशन आणि मुस्लिम बांधवांनी विसर्जन मिरवणुकीचे उत्साहात स्वागत केले. या प्रसंगी जिलाधिकारी आयुष प्रसाद आणि जिल्हा पोलीस अधीक्षक डॉ. महेश्वर रेड्डी यांच्यासह अनेक मान्यवर उपस्थित होते.
मिरवणुकीची सुरुवात जळगाव शहरातील मानाच्या गणपतीच्या आगमनाने झाली. या वेळी हिंदू बांधवांनी पीर लालशाह बाबांच्या दर्ग्यावर चादर आणि फुले अर्पण करून प्रार्थना केली. यानंतर पारंपरिक आरती करण्यात आली. हा सोहळा हिंदू-मुस्लिम सलोख्याचा एक आदर्श नमुना होता.
यानंतर, मिरवणुकीत सहभागी झालेल्या सर्व गणेश मंडळांचे सै. नियाज अली भैय्या फॉउंडेशन आणि मुस्लिम बांधवांनी जोरदार स्वागत केले. मंडळांच्या अध्यक्षांना आणि उपाध्यक्षांना पुष्पहार घालून, गुलाबाची फुले देऊन आणि फुलांच्या पाकळ्यांचा वर्षाव करून त्यांचे अभिनंदन करण्यात आले. या वेळी गळाभेट घेऊन शुभेच्छांचे आदानप्रदान झाले, ज्यामुळे धार्मिक सलोखा अधिक दृढ झाला.
या कार्यक्रमाला जळगाव मनपा आयुक्त ज्ञानेश्वर ढेरे, तहसीलदार शीतल राजपूत, पोलीस उप अधीक्षक नितीन गणापुरे, तसेच सै. अयाज अली नियाज अली, हाजी शकुर बादशाह, रहेमत अली, शेख शफी, शेख जलालुद्दीन, अशफाक नुरी, ओवेश हुसैन यांच्यासह अनेक प्रतिष्ठित व्यक्ती उपस्थित होत्या. या समन्वित प्रयत्नांमुळे गणेश विसर्जन मिरवणुकीला एक वेगळाच आनंद आणि सौहार्द लाभला.
