जामनेरमध्ये IPL सट्ट्यावर एलसीबीची मोठी रेड; १० लाखांच्या मुद्देमालासह चौघांना बेड्या!
एलसीबीची कारवाई ; तालुक्यात खळबळ
जामनेर : आयपीएल क्रिकेट सामन्यांवर ऑनलाईन सट्टा लावून जुगार खेळणाऱ्या टोळीवर स्थानिक गुन्हे शाखेने (एलसीबी) धडक कारवाई करत लाखोंचा मुद्देमाल जप्त केला आहे. जामनेर पोलीस स्टेशन हद्दीतील हिवरखेडा रोड परिसरात सुरू असलेल्या या ऑनलाईन सट्टा अड्ड्यावर छापा टाकत पोलिसांनी चौघांना ताब्यात घेतले.
जामनेर परिसरात काही इसम घरामध्ये बसून आयपीएल क्रिकेट मॅचवर ऑनलाईन सट्टा लावत असल्याची गोपनीय माहिती पोलिसांना मिळाली होती. त्यानुसार पोलिसांनी खात्री करून नियोजनबद्ध पद्धतीने छापा टाकला. या कारवाईत मोठ्या प्रमाणात रोख रक्कम व इलेक्ट्रॉनिक साहित्य जप्त करण्यात आले.
छाप्यामध्ये पोलिसांनी ९ लाख २ हजार ३०० रुपये रोख रक्कम, १ लाख ३० हजार रुपये किमतीचे मोबाईल फोन, २५ हजार रुपये किमतीचा टीव्ही व साउंड बार, तसेच ४१ एटीएम कार्ड असा मुद्देमाल हस्तगत केला. इतर साहित्यांसह एकूण १० लाख ५३ हजार ८०० रुपयांचा मुद्देमाल जप्त करण्यात आला आहे.
या प्रकरणात देवानंद सुभाष सोनवणे, रितेश अशोक नेरकर, परीक्षित रविंद्र पाटील आणि प्रवीण जगन्नाथ टहाकडे, सर्व रा. जामनेर यांना पोलिसांनी ताब्यात घेतले आहे.
या कारवाईवरून जामनेर पोलीस ठाण्यात गुन्हा रजिस्टर नंबर २३६/२०२६ नुसार महाराष्ट्र जुगार प्रतिबंधक अधिनियम कलम ४ आणि ५ अंतर्गत चौघांविरोधात गुन्हा दाखल करण्यात आला आहे. पुढील तपास सुरू आहे.
