एच. जे. थिम कॉलेजमध्ये ‘शी बॉक्स’चे उद्घाटन;महिला सुरक्षा आणि सन्मानावर दिला भर
जळगाव (विशेष प्रतिनिधी):
इक्रा एज्युकेशन सोसायटी संचालित एच. जे. थिम आर्ट्स अँड सायन्स कॉलेज, मेहरुण येथे अंतर्गत तक्रार समितीच्या (ICC) वतीने “इंडक्शन-कम-अवेअरनेस प्रोग्राम” आणि ‘शी बॉक्स’ (SHE Box) चा उद्घाटन सोहळा उत्साहात पार पडला.
या कार्यक्रमाचे उद्घाटन मुख्य अतिथी इक्रा एज्युकेशन सोसायटीचे अध्यक्ष डॉ. अब्दुल करीम सालार यांच्या हस्ते ‘शी बॉक्स’चे अनावरण करून करण्यात आले. याप्रसंगी अध्यक्षीय भाषणात डॉ. सालार म्हणाले, “हा केवळ एका बॉक्सचा किंवा सुविधेचा प्रारंभ नाही, तर कॉलेजच्या आवारात सर्व विद्यार्थिनी आणि महिलांसाठी सुरक्षित, संरक्षित आणि सन्मानजनक वातावरण निर्माण करण्याच्या आमच्या कटिबद्धतेचे प्रतीक आहे.”
कॉलेजचे प्राचार्य डॉ. वकार शेख यांनी आपले मनोगत व्यक्त करताना सांगितले की, “सुरक्षित आणि भयमुक्त कार्यस्थळ तसेच शिक्षण संस्था हा प्रत्येक महिलेचा मूलभूत अधिकार आहे. हा अधिकार सुनिश्चित करण्यासाठी आमची संस्था सर्वतोपरी पावले उचलेल.”
या सोहळ्यात डॉ. ए. एफ. बासित यांनी विद्यार्थ्यांना अंतर्गत तक्रार समितीची (ICC) भूमिका, कार्यपद्धती आणि त्यांच्या हक्कांबद्दल सविस्तर माहिती दिली. तसेच परिसरामध्ये प्रतिष्ठा आणि आदराची संस्कृती जोपासण्याचे आवाहन उपस्थितांना केले.
या कार्यक्रमाचे सूत्रसंचालन श्री. एम. एम. काझी यांनी केले, तर उपस्थितांचे आभार डॉ. एफ. एस. शेख यांनी मानले. या प्रसंगी कॉलेजच्या मोठ्या संख्येने विद्यार्थिनी, प्राध्यापक आणि शिक्षकेतर कर्मचारी उपस्थित होते.
