जिल्हाधिकारी कार्यालयासमोर दुचाकीला ट्रॅक्टरची धडक; शिवाजी पाटील जखमी
महापालिकेच्या ट्रॅक्टरचा समावेश; चालक अल्पवयीन असल्याची माहिती, पोलिसांकडून घटनास्थळाची पाहणी
जळगाव : शहरात सोमवारी सकाळी जिल्हाधिकारी कार्यालयासमोर दुचाकीला ट्रॅक्टरने जोरदार धडक दिल्याची घटना घडली. या अपघातात पेहलवान शिवाजी पाटील (शिवा) हे जखमी झाले असून त्यांच्या हाताला दुखापत झाली आहे. त्यांच्यावर शहरातील खासगी रुग्णालयात उपचार सुरू असून प्रकृती स्थिर असल्याची माहिती आहे.
व्यायामशाळेकडे जात असताना अपघात
मिळालेल्या माहितीनुसार, सकाळी सुमारे ७ वाजता शिवाजी पाटील हे दुचाकीवरून व्यायामशाळेकडे जात होते. जिल्हाधिकारी कार्यालयासमोर विरुद्ध दिशेने येणाऱ्या एमएच १९ एएन ३१४३ क्रमांकाच्या ट्रॅक्टरने त्यांच्या दुचाकीला जोरदार धडक दिली. धडक एवढी जोरदार होती की दुचाकीचे मोठ्या प्रमाणात नुकसान झाले.
नागरिकांनी घेतली धाव
अपघातानंतर परिसरातील नागरिकांनी घटनास्थळी धाव घेतली. घटनेची माहिती मिळताच पोलिसांनीही घटनास्थळी पोहोचून पाहणी केली आणि अपघाताची माहिती घेतली.
महापालिकेच्या वाहनाचा समावेश?
अपघातास कारणीभूत ठरलेला ट्रॅक्टर जळगाव महानगरपालिकेचा असल्याची माहिती समोर आली आहे. तसेच या ट्रॅक्टरचा चालक अल्पवयीन असल्याचीही माहिती मिळाली आहे. त्यामुळे महापालिकेच्या वाहनावर अल्पवयीन व्यक्ती वाहन चालवत असल्यास हा प्रकार गंभीर ठरण्याची शक्यता आहे.
दरम्यान, उपलब्ध माहितीनुसार या अपघाताची अद्याप पोलिसांत अधिकृत नोंद झालेली नाही. जखमी शिवाजी पाटील यांच्यावर खासगी रुग्णालयात उपचार सुरू असून त्यांची प्रकृती स्थिर असल्याचे सांगण्यात आले.
