राष्ट्रवादी काँग्रेस (अजित पवार गट) पदाधिकारी विनोद देशमुख यांना अटक
जळगाव : शहरातील राजकीय वर्तुळात खळबळ उडवणारी घटना घडली असून राष्ट्रवादी काँग्रेस (अजित पवार गट) चे स्थानिक पदाधिकारी विनोद पंजाबराव देशमुख यांना पोलिसांनी मध्यरात्री अटक केली.
मिळालेल्या माहितीनुसार, ३१ ऑक्टोबर २०२२ रोजी व्यावसायिक मनोज लिलाधर वाणी यांच्या कार्यालयावर झालेल्या हल्ल्याच्या प्रकरणात देशमुख यांच्याविरुद्ध दरोडा आणि जीवे मारण्याच्या धमकीचा गुन्हा दाखल करण्यात आला होता. हा गुन्हा १२ नोव्हेंबर २०२२ रोजी रामानंदनगर पोलीस ठाण्यात नोंदवला गेला होता.
या प्रकरणाच्या तपासात रामानंदनगर पोलीस ठाण्याचे निरीक्षक राजेंद्र गुंजाळ यांच्या पथकाने २३ सप्टेंबर २०२५ रोजी मध्यरात्री कारवाई करून देशमुख यांना ताब्यात घेतले. त्यांच्या अटकेमुळे शहरात मोठी खळबळ उडाली असून स्थानिक राजकारणात चर्चेला उधाण आले आहे.
पुढील तपास पोलिसांकडून सुरू असून देशमुख यांना न्यायालयात हजर करण्यात येणार असल्याची माहिती सूत्रांनी दिली.
