मुख्यमंत्री जळगावात, पण आरटीओ गायब! देवेंद्र फडणवीस यांच्या दौऱ्याला प्रादेशिक परिवहन अधिकाऱ्यांची ‘दांडी’
जळगाव | प्रतिनिधी महाराष्ट्राचे मुख्यमंत्री देवेंद्र फडणवीस आज जळगाव शहरात महानगरपालिका निवडणुकीच्या प्रचारासाठी येत असतानाच, शासकीय शिष्टाचाराला बगल देण्याचा एक धक्कादायक प्रकार समोर आला आहे. मुख्यमंत्र्यांच्या या अत्यंत महत्त्वाच्या दौऱ्याला जबाबदार विभागप्रमुख असलेले प्रादेशिक परिवहन अधिकारी (RTO) राजेंद्र वर्मा यांनी अचानक दांडी मारल्याने प्रशासकीय वर्तुळात मोठी चर्चा सुरू झाली आहे. आज दुपारी ३ वाजता मुख्यमंत्र्यांची सभा आणि रोड शो आयोजित करण्यात आला आहे, मात्र या दौऱ्याच्या नियोजनातून प्रमुख अधिकारीच गायब असल्याने आश्चर्य व्यक्त केले जात आहे.
वास्तविक पाहता, कोणत्याही अतिमहत्त्वाच्या व्यक्तीच्या (VVIP) दौऱ्यामध्ये सुरक्षा पुरवण्याची मुख्य जबाबदारी पोलीस दलाची असली, तरी वाहतूक नियंत्रण, ताफ्यातील वाहनांची तांत्रिक तपासणी आणि मुख्यमंत्र्यांच्या प्रवासात कोणताही अडथळा निर्माण होणार नाही याची कायदेशीर जबाबदारी आरटीओ विभागाकडे असते. अशा संवेदनशील दौऱ्याच्या वेळी जिल्ह्याचे प्रमुख आरटीओ अधिकारी म्हणून राजेंद्र वर्मा यांनी उपस्थित राहणे प्रोटोकॉलनुसार आवश्यक होते. मात्र, त्यांनी दौऱ्याच्या दिवशीच रजा घेतल्याने किंवा ते अनुपस्थित राहिल्याने ‘महत्त्वाच्या दौऱ्याला आरटीओंची दांडी’ या विषयावर सध्या जळगावात राजकीय आणि प्रशासकीय चर्चांना उधाण आले आहे.
मुख्यमंत्र्यांच्या सुरक्षेच्या ताफ्यात (कॉन्व्हॉय) असलेल्या वाहनांची सुस्थिती आणि मार्गावरील वाहतुकीचे सूक्ष्म नियोजन हे आरटीओच्या देखरेखीखाली होणे अपेक्षित असते. ऐन निवडणुकीच्या रणधुमाळीत खुद्द मुख्यमंत्री शहरात येत असताना एका बड्या अधिकाऱ्याने अशा प्रकारे दौऱ्याकडे पाठ फिरवणे हे शिस्तभंगाच्या कक्षेत येते का, असा प्रश्न उपस्थित केला जात आहे. या प्रकारामुळे पोलीस प्रशासनावर वाहतुकीचा अतिरिक्त ताण पडण्याची शक्यता असून, वरिष्ठ पातळीवरून या गैरहजेरीची दखल घेतली जाते का, याकडे सर्वांचे लक्ष लागले आहे.
