नेहरूनगरात ३७ वर्षीय तरुणाची आत्महत्या
जळगाव (प्रतिनिधी) – शहरातील नेहरूनगर परिसरात राहणाऱ्या ३७ वर्षीय तरुणाने राहत्या खोलीत गळफास घेऊन आत्महत्या केल्याची धक्कादायक घटना सोमवारी (१४ जुलै) दुपारच्या सुमारास उघडकीस आली. आत्महत्या केलेल्या तरुणाचे नाव नानक कन्हैयालाल सोदाई (वय ३७) असे आहे.
मिळालेल्या माहितीनुसार, नानक सोदाई हे रविवारी रात्री झोपण्यासाठी खोलीचा दरवाजा आतून बंद करून झोपले होते. सोमवारी दुपारीपर्यंत दरवाजा उघडला गेला नाही, किंवा काही हालचाल जाणवली नाही, त्यामुळे त्यांच्या भावाने दरवाजा ठोठावला. दरवाजातून प्रतिसाद न आल्याने त्याने खिडकीतून डोकावून पाहिले असता, नानक गळफास घेतलेल्या अवस्थेत दिसून आले.
तातडीने दरवाजा उघडून त्यांना शासकीय वैद्यकीय महाविद्यालय आणि रुग्णालयात नेण्यात आले. मात्र, डॉक्टरांनी त्यांना दाखल करण्यापूर्वीच मृत घोषित केले.
या घटनेबाबत एमआयडीसी पोलीस ठाण्यात अकस्मात मृत्यूची नोंद करण्यात आली असून, आत्महत्येचे नेमके कारण अद्याप अस्पष्ट आहे. पोलीस तपास सुरू आहे.
