जळगाव शहरात पोलिसांची ‘वॉश आऊट’ मोहीम ; ८४ गुन्हेगार ताब्यात
जळगाव I प्रतिनिधी जळगाव जिल्हा पोलीस दलाने गुरुवारी, ९ ऑक्टोबर रोजी पहाटेच्या सुमारास शहरात ‘वॉश आऊट’ या विशेष शोध मोहिमेअंतर्गत मोठे कोंबिंग ऑपरेशन राबवले. पहाटे ३ ते सकाळी ६ वाजेपर्यंत चाललेल्या या धडक कारवाईत विविध गंभीर गुन्ह्यांमध्ये सामील असलेल्या ८४ हून अधिक गुन्हेगारांना पोलिसांनी अटक केली आहे.
ही मोहीम जळगाव शहर, जिल्हापेठ, एमआयडीसी, जळगाव तालुका आणि रामानंदनगर पोलीस ठाण्यांच्या हद्दीत संवेदनशील भागांवर केंद्रित होती. अचानक केलेल्या या कारवाईमुळे गुन्हेगारांमध्ये प्रचंड खळबळ उडाली.
अटकेत असलेल्यांमध्ये हद्दपार गुन्हेगार, फरार आरोपी, रेकॉर्डवरील अट्टल गुन्हेगार, चोरटे तसेच अवैध दारू विक्रेते यांचा समावेश आहे. पोलिसांनी या सर्वांना ताब्यात घेऊन संबंधित ठाण्यांमध्ये प्रतिबंधात्मक कारवाई सुरू केली आहे. विशेषतः विनापरवानगी हद्दीत परत आलेल्या गुन्हेगारांविरुद्ध कठोर कारवाईचा बडगा उगारण्यात येत आहे.
जिल्हा पोलीस अधीक्षक महेश्वर रेड्डी यांच्या मार्गदर्शनाखाली हे ऑपरेशन यशस्वीरित्या पार पडले. अपर पोलीस अधीक्षक अशोक नखाते, विभागीय पोलीस अधिकारी नितीन गणापुरे आणि स्थानिक गुन्हे शाखेचे वरिष्ठ पोलीस निरीक्षक राहुल गायकवाड यांच्या मार्गदर्शनाखाली शहर पोलीस ठाण्याचे निरीक्षक सागर शिंपी, शनिपेठचे कावेरी कमलाकर, एमआयडीसीचे बबन आव्हाड, जिल्हापेठचे प्रदीप ठाकूर, जळगाव तालुक्याचे सहाय्यक निरीक्षक अनंत अहिरे आणि रामानंदनगरचे निरीक्षक राजेंद्र गुंजाळ यांच्यासह सर्व पोलीस पथकांनी सक्रिय सहभाग घेतला.
जळगाव जिल्हा पोलीस दलाने शहरातील शांतता आणि कायदा सुव्यवस्था टिकवण्यासाठी ‘वॉश आऊट’सारख्या मोहिमांद्वारे गुन्हेगारांना चांगलीच जरब बसवली आहे. भविष्यातही अशा कारवाया सुरू राहणार असल्याचे संकेत पोलिसांनी दिले आहेत.
