जळगाव जिल्ह्यात ऑल आऊट’ मोहिमेत १९५ आरोपींवर कारवाई
‘मुस्कान’ अंतर्गत ३४ हरविलेले बालक व महिला सुखरूप शोधले
जळगाव प्रतिनिधी — जिल्ह्यात कायदा व सुव्यवस्था मजबूत करण्यासाठी जिल्हा पोलीस दलाकडून राबविण्यात आलेल्या ‘ऑल आऊट’ विशेष मोहिमेत मोठी कारवाई करण्यात आली. या मोहिमेदरम्यान १९५ संशयित आरोपींवर कठोर कायदेशीर कारवाई करण्यात आली असून, ‘मुस्कान’ मोहिमेत हरविलेल्या ३४ बालक व महिलांना सुखरूप शोधण्यात पोलिसांना यश आले आहे.
३६ पोलीस ठाण्यांचा समन्वय
पोलीस अधीक्षक श्रीकांत धिवरे यांच्या मार्गदर्शनाखाली २८ एप्रिल २०२६ रोजी सकाळी १० ते रात्री ११ या वेळेत ही मोहीम राबविण्यात आली. जिल्ह्यातील ३६ पोलीस ठाणे व ३ वाहतूक शाखांनी एकत्रितपणे कारवाई करत २१ ठिकाणी नाकाबंदी केली.
२५ लाखांचा अवैध मुद्देमाल जप्त
या व्यापक कारवाईत पोलिसांनी तब्बल २५ लाखांहून अधिक किमतीचा अवैध मुद्देमाल जप्त केला. विविध गुन्ह्यांमध्ये सहभागी असलेल्या आरोपींविरुद्ध कारवाई करत गुन्हेगारीवर आळा घालण्याचा प्रयत्न करण्यात आला.
‘मुस्कान’ मोहिमेचे यश
या मोहिमेचे विशेष वैशिष्ट्य म्हणजे ‘मुस्कान’ अंतर्गत हरविलेल्या ३४ बालक व महिलांना शोधून त्यांच्या नातेवाईकांच्या स्वाधीन करण्यात आले. या कामगिरीमुळे पोलिसांचे कौतुक होत आहे.
मद्यपी वाहनचालकांवर कारवाई
वाहतूक नियमांचे उल्लंघन करणाऱ्यांवरही पोलिसांनी कडक कारवाई केली. २७२ मद्यपी वाहनचालकांवर कारवाई करून ४ लाख १८ हजार ६२९ रुपयांचा दंड वसूल करण्यात आला.
अवैध धंद्यांवर धाड
अवैध हातभट्टी दारू अड्ड्यांवर धाडी टाकून १३६ गुन्हे दाखल करण्यात आले. तसेच सायबर माध्यमांवर अश्लील रिल्स बनवणाऱ्या आणि टवाळखोरांवरही पोलिसांनी कारवाई करत वचक निर्माण केला आहे.
