लाडकी बहीण योजनेचा थकीत हप्ता; महिलांना लवकरच दिलासा?
ई-केवायसीनंतर पात्र लाभार्थींना मार्च-एप्रिलचे पैसे मिळण्याची शक्यता
मुंबई : राज्यातील महिलांसाठी राबविण्यात येणाऱ्या मुख्यमंत्री लाडकी बहीण योजना संदर्भात मोठी आणि महत्त्वाची घडामोड समोर आली आहे. ई-केवायसी प्रक्रिया पूर्ण झाल्यानंतर आता लाभार्थी महिलांना थकीत हप्ते कधी मिळणार, याकडे सर्वांचे लक्ष लागले आहे.
फेब्रुवारी महिन्यानंतर अद्याप हप्ते जमा न झाल्याने महिलांमध्ये संभ्रमाचे वातावरण निर्माण झाले होते. मात्र, आता राज्य सरकारकडून लवकरच दिलासा मिळण्याची शक्यता व्यक्त केली जात आहे. येत्या काही दिवसांत होणाऱ्या मंत्रिमंडळ बैठकीत याबाबत महत्त्वाचा निर्णय होण्याची चिन्हे आहेत.
ई-केवायसीमुळे लाखो महिला अपात्र
योजनेत पारदर्शकता आणण्यासाठी ई-केवायसी अनिवार्य करण्यात आली होती. ही प्रक्रिया पूर्ण न केल्याने सुमारे ५४ लाख महिला अपात्र ठरल्या आहेत. आता सुमारे १ कोटी ८९ लाख पात्र महिलांनाच दरमहा १५०० रुपयांचा लाभ मिळणार आहे.
थकीत हप्त्यांबाबत ‘गुड न्यूज’
मार्च, एप्रिल तसेच काही ठिकाणी मे महिन्याचे हप्तेही अनेक महिलांच्या खात्यात जमा झालेले नाहीत. काहींना जानेवारी-फेब्रुवारीचे पैसेही मिळाले नसल्याच्या तक्रारी आहेत. दरम्यान, निवडणुकांमुळे लागू असलेल्या आचारसंहितेमुळे निधी वितरणात विलंब झाल्याचे सांगितले जात होते.
१० मेपर्यंत ३००० रुपये मिळण्याची शक्यता
सरकार दर महिन्याच्या १० तारखेपर्यंत हप्ता जमा करत असल्याने, येत्या १० मेपर्यंत मार्च आणि एप्रिल या दोन महिन्यांचे मिळून ३००० रुपये पात्र महिलांच्या खात्यात जमा होण्याची दाट शक्यता आहे. तसेच तांत्रिक अडचणींमुळे थांबलेले हप्तेही सोडवण्याबाबत निर्णय होण्याची अपेक्षा आहे.
यामुळे राज्यातील लाखो महिलांच्या खात्यात पुन्हा एकदा आर्थिक दिलासा पोहोचणार असून, ‘लाडक्या बहिणींसाठी’ आनंदाची बातमी येण्याची चिन्हे स्पष्ट दिसत आहेत.
