रेल्वेखाली तिघांचा मृत्यू; आत्महत्येचा संशय
पाचोरा ते परधाडे रेल्वे स्थानकादरम्यान हृदयद्रावक घटना
पाचोरा | प्रतिनिधी – पाचोरा ते परधाडे रेल्वे स्थानकादरम्यान काल सायंकाळी (५ मे) घडलेली एक हृदयद्रावक घटना समोर आली आहे. एका तरुण पुरुषासोबत एक महिला व सुमारे अडीच वर्षांचा बालक रेल्वेखाली आल्याने तिघांचाही मृत्यू झाला. या प्रकरणात आत्महत्येचा प्राथमिक अंदाज पोलिसांनी व्यक्त केला असून, पुढील तपास सुरू आहे.
अयोध्या सुपरफास्ट एक्सप्रेसचे लोकोपायलट डी. एफ. डिसुझा यांनी रेल्वे स्थानक अधिकाऱ्यांना माहिती दिली की, रेल्वे किलोमीटर खांब क्रमांक ३७६/१९ जवळ तिघेजण रेल्वे पटरीवरून चालत येताना गाडीच्या समोर आले. या दुर्घटनेत तिघांचाही जागीच मृत्यू झाला.
माहिती मिळताच सहाय्यक पोलीस निरीक्षक दिनेश भदाणे, पोलीस उपनिरीक्षक योगेश गणगे आणि त्यांच्या पथकाने घटनास्थळी धाव घेतली. मृतदेह पाचोरा ग्रामीण रुग्णालयात हलवण्यात आले. मृतांपैकी तरुण पुरुषाची ओळख राजेंद्र निंबा मोरे (वय २२, रा. भातखंडे खुर्द, ता. पाचोरा) अशी पटली आहे. मात्र, संबंधित महिला व बालकाची ओळख अद्याप पटलेली नाही.
या घटनेप्रकरणी पाचोरा पोलीस ठाण्यात अकस्मात मृत्यूची नोंद करण्यात आली आहे. पोलीस निरीक्षक अशोक पवार यांच्या मार्गदर्शनाखाली तपास सुरू असून, या तिघांनी आत्महत्या करण्याचा निर्णय का घेतला, याचा शोध घेतला जात आहे.
या घटनेमुळे परिसरात हळहळ व्यक्त केली जात आहे. नागरिकांनी ओळख न पटलेल्या मृतांविषयी कोणतीही माहिती असल्यास पोलीस ठाण्याशी तातडीने संपर्क साधण्याचे आवाहन करण्यात आले आहे.
