महिलांचे मंगळसूत्र लांबविणाऱ्याच्या मुस्क्या आवळल्या
जळगाव
महिलांच्या गळ्यातून मंगळसूत्र लांबविणाऱ्या चोरट्याला शनिपेठ पोलिसांनी 23 रोजी अटक केली असून त्याने तीन गुन्ह्यांची कबुली दिली असल्याची माहिती पोलीस अधीक्षक डॉक्टर महेश्वर यांनी पत्रकार परिषदेत दिली.
गणेश राजेंद्र माळी (वय २९, रा. आसोदा, ता. जि. जळगाव) असे आरोपीचे नाव आहे.
गेल्या दोन महिन्यांपासून शनिपेठ आणि एमआयडीसी पोलीस ठाण्याच्या हद्दीत सोनसाखळी चोरीच्या घटना घडल्या होत्या. आरोपींना पकडण्यासाठी पोलीस अधीक्षक, अप्पर पोलीस अधीक्षक जळगाव आणि उपविभागीय पोलीस अधिकारी जळगाव यांनी सूचना दिल्या होत्या. त्यानुसार, वेगवेगळ्या घटनांच्या सीसीटीव्ही फुटेज आणि तांत्रिक पुराव्याच्या आधारावर तपास सुरू करण्यात आला. शनिपेठ पोलिसांनी संशयित आरोपी गणेश राजेंद्र माळी याला आसोदा गावातून अटक केली आहे.
आरोपी गणेश माळी याने गुन्ह्याची कबुली दिली आहे. शनिपेठ पोलीस ठाण्याच्या अंतर्गत दोन आणि एमआयडीसी पोलीस ठाणे येथे एक असे एकूण तीन गुन्ह्यांची कबुली दिली आहे. त्याच्याकडून चोरीतील २३ ग्रॅम सोन्याचे मंगळसूत्र जप्त करण्यात आले आहे. पुढील कारवाईसाठी त्याला शनिपेठ पोलिसांच्या ताब्यात देण्यात आले आहे.
