घरफोडी प्रकरणातील फरार अट्टल चोरटा अखेर पोलिसांच्या ताब्यात
२७ हजारांचा मुद्देमाल जप्त; १९ दिवस पोलिसांना चकवा देत होता आरोपी
जळगाव – एमआयडीसी परिसरातील जगवाणी नगरातील घरफोडी प्रकरणातील १९ दिवसांपासून फरार असलेल्या अट्टल चोरट्याला पोलिसांनी अखेर गजाआड केले. या आरोपीकडून २७ हजार रुपये किमतीच्या ५० किलो तांब्याच्या तारा जप्त करण्यात आल्या.
१६ ते २७ एप्रिल २०२५ दरम्यान एका दुकानाचे शटर वाकवून १८,५०० रुपये किमतीच्या जुन्या आणि नव्या तांब्याच्या तारा चोरीला गेल्या होत्या. याप्रकरणी भारतीय न्याय संहिता २०२३ अंतर्गत गुन्हा दाखल करण्यात आला. पोलिसांनी २ मे रोजी दोन आरोपींना अटक केली होती; मात्र तिसरा आरोपी शिकवणसिंग बरियामसिंग उर्फ पटमलसिंग टाक हा फरार राहिला होता.
गुप्त माहितीच्या आधारे ४ ऑगस्ट रोजी वाघनगर परिसरातून त्याला सहायक फौजदार विजयसिंग पाटील आणि पोलीस नाईक प्रदीप चौधरी यांनी जेरबंद केले. दोन दिवसांच्या पोलीस कोठडीत चौकशीत त्याने चोरीचा मुद्देमाल उघडकीस आणला.
ही कारवाई पोलीस अधीक्षक महेश्वर रेड्डी, अपर पोलीस अधीक्षक अशोक नखाते, पोलीस उपअधीक्षक संदीप गावीत आणि पोलीस निरीक्षक बबन आव्हाड यांच्या मार्गदर्शनाखाली, उपनिरीक्षक राहुल तायडे यांच्या पथकाने केली.
