जळगावच्या वाघ नगर परिसरात महिलेची गळफास घेऊन आत्महत्या
जळगाव, : जळगाव शहरातील वाघ नगर परिसरातील नवजीवन कॉलनीत राहणाऱ्या चंद्रकला अरुण निकम (वय ३५) यांनी शुक्रवारी, २९ ऑगस्ट २०२५ रोजी सकाळी १० वाजण्याच्या सुमारास राहत्या घरी गळफास घेऊन आत्महत्या केल्याची धक्कादायक घटना उघडकीस आली आहे. या प्रकरणी जळगाव तालुका पोलीस ठाण्यात अकस्मात मृत्यूची नोंद करण्यात आली असून, पोलिसांनी तपास सुरू केला आहे.
चंद्रकला निकम यांचे पती अरुण निकम हे कारपेंटर म्हणून काम करतात आणि त्यांच्यावरच कुटुंबाचा उदरनिर्वाह अवलंबून आहे. त्यांना दोन लहान मुले असून, ती शाळेत जातात. शुक्रवारी सकाळी अरुण निकम हे नेहमीप्रमाणे कामावर गेले, तर त्यांची मुले शाळेत गेली होती. यावेळी घरी एकट्या असलेल्या चंद्रकला यांनी गळफास लावून आत्महत्या केली. शेजारील नागरिक त्यांना भेटण्यासाठी घरी गेले असता ही घटना उघडकीस आली. त्यांनी तातडीने अरुण निकम यांना माहिती दिली.
घटनेची माहिती मिळताच स्थानिकांनी चंद्रकला यांना तात्काळ शासकीय वैद्यकीय महाविद्यालय व रुग्णालयात दाखल केले. मात्र, वैद्यकीय अधिकाऱ्यांनी तपासणीअंती त्यांना मयत घोषित केले. जळगाव तालुका पोलीस ठाण्यात या प्रकरणी अकस्मात मृत्यूची नोंद करण्यात आली आहे. आत्महत्येचे नेमके कारण अद्याप स्पष्ट झाले नसून, पोलिसांनी पुढील तपास सुरू केला आहे
