जळगाव जिल्ह्यात पोलिसांचे ‘ऑपरेशन स्क्रॅप’ ! जिल्ह्यातील सर्व भंगार दुकानांवर एकाच वेळी छापे
चोरीचा माल खपवणाऱ्या साखळीवर पोलिसांचा प्रहार; घरफोडी आणि वाहन चोरीला बसणार लगाम
जळगाव | प्रतिनिधी जळगाव जिल्ह्यामध्ये वाढत्या चोऱ्या आणि घरफोडीच्या घटनांना पायबंद घालण्यासाठी पोलीस अधीक्षक श्रीकांत धिवरे यांच्या आदेशानुसार आज सायंकाळपासून संपूर्ण जिल्ह्यात ‘भंगार दुकान तपासणी’ ही धडाकेबाज मोहीम राबवण्यात येत आहे. चोरीचा माल विकण्याचे मुख्य केंद्र असलेल्या भंगार बाजारावर पोलिसांनी लक्ष केंद्रित केल्याने गुन्हेगारांचे धाबे दणाणले आहेत.
चोरीची साखळी तोडण्यासाठी ‘प्लॅन’ सज्ज
गुन्हेगारी विश्वाचा अभ्यास केला असता पोलिसांना असे लक्षात आले आहे की, घरफोडी, वाहन चोरी किंवा रेल्वेचे रूळ आणि विजेच्या तारांची चोरी करणारा माल थेट भंगार दुकानात खपवला जातो. अनेकदा महागड्या गाड्या चोरून त्यांचे सुटे भाग (Vehicle Scraping) या दुकानांमध्ये केले जातात. हीच साखळी मोडीत काढण्यासाठी पोलिसांनी आज जिल्ह्यातील सर्व प्रमुख भंगार दुकानांची झाडाझडती सुरू केली आहे.
या मुद्यांवर पोलिसांची करडी नजर
वाहन चोरी: संशयास्पद गाड्यांचे इंजिन, सुटे भाग आणि कागदपत्रे नसलेली वाहने.
शेती अवजारे: शेतकऱ्यांच्या विहिरींवरील मोटारी, केबल आणि लोखंडी अवजारांची तपासणी.
सार्वजनिक मालमत्ता: रेल्वेचे साहित्य आणि विजेच्या तारांचा साठा.
रेकॉर्ड तपासा, अन्यथा कारवाई!
भंगार दुकानदारांना कोणताही माल विकत घेताना तो कोणाकडून घेतला, याची नोंद ठेवणे बंधनकारक आहे. मात्र, अनेक दुकानदार स्वस्त दरात चोरीचा माल विकत घेऊन पोलिसांच्या डोळ्यात धूळ फेकतात. आजच्या या मोहिमेमध्ये ज्या दुकानदारांकडे संशयास्पद माल आढळेल किंवा नोंदी नसतील, त्यांच्यावर थेट गुन्हे दाखल करण्याचे संकेत पोलिसांनी दिले आहेत.
या धडाकेबाज मोहिमेमुळे चोरीच्या साखळीतील महत्त्वाचा दुवा निखळण्याची शक्यता असून, सायंकाळपासून सुरू असलेल्या या कारवाईने संपूर्ण जळगाव जिल्ह्यात मोठी खळबळ उडाली आहे
