PWD मध्ये ‘एसीबी’चा धमाका! ५ लाखांची लाच घेताना शाखा अभियंता जाळ्यात
मक्तेदाराचे बिल काढण्यासाठी मागितले होते १५ लाख; जळगावात खळबळजनक कारवाई
जळगाव: जिल्ह्यात लाचखोरीच्या घटना थांबण्याचे नाव घेत नसून, आज शनिवारी लाचलुचपत प्रतिबंधक विभागाने सार्वजनिक बांधकाम विभागात (PWD) मोठी कारवाई केली. प्रलंबित बिल मंजूर करण्याच्या बदल्यात ५ लाख रुपयांची लाच स्वीकारताना शाखा अभियंता योगेश अहिरे यांना एसीबीच्या पथकाने रंगेहात अटक केली. या कारवाईमुळे शासकीय यंत्रणेत मोठी खळबळ उडाली आहे.
१५ लाखांची होती मागणी
मिळालेल्या माहितीनुसार, एका नोंदणीकृत कंत्राटदाराने सार्वजनिक बांधकाम विभागांतर्गत काही महत्त्वाची कामे पूर्ण केली होती. या कामांचे लाखो रुपयांचे देयक (बिल) मंजूर करण्यासाठी कंत्राटदाराने शाखा अभियंता योगेश अहिरे यांची भेट घेतली. यावेळी अहिरे यांनी हे बिल मंजूर करण्याच्या मोबदल्यात कंत्राटदाराकडे सुरुवातीला १५ लाख रुपयांच्या लाचेची मागणी केली होती.
तडजोड आणि सापळा
लाच देण्याची इच्छा नसल्याने कंत्राटदाराने जळगाव एसीबीकडे धाव घेऊन तक्रार नोंदवली. एसीबीच्या पथकाने तक्रारीची गांभीर्याने दखल घेत पडताळणी केली. तडजोडीअंती ५ लाख रुपये देण्याचे ठरले. त्यानुसार आज दुपारी सार्वजनिक बांधकाम विभागाच्या कार्यालय परिसरात सापळा रचण्यात आला.
पहिला हप्ता घेतानाच पडल्या बेड्या
ठरल्याप्रमाणे कंत्राटदाराकडून ५ लाख रुपयांची रोकड स्वीकारत असतानाच दबा धरून बसलेल्या एसीबीच्या पथकाने झडप घालून योगेश अहिरे यांना रंगेहात पकडले. त्यांच्या ताब्यातून लाचेची रक्कम हस्तगत करण्यात आली असून त्यांना तातडीने ताब्यात घेण्यात आले आहे.
प्रशासकीय पडसाद:
भरदिवसा आणि कार्यालयाच्या परिसरातच ही कारवाई झाल्याने सार्वजनिक बांधकाम विभागातील अधिकारी व कर्मचाऱ्यांचे धाबे दणाणले आहेत. या प्रकरणी भ्रष्टाचार प्रतिबंधक कायद्यान्वये गुन्हा दाखल करण्याची प्रक्रिया रात्री उशिरापर्यंत सुरू होती.
