फैजपूर नगरपालिकेच्या हद्दवाढीचा प्रश्न ऐरणीवर; मंत्रालयात नगरविकास विभागासोबत महत्त्वपूर्ण बैठक
माजी नगराध्यक्षांनी घेतली सहसचिवांची भेट; शहराच्या नियोजनबद्ध विकासासाठी पाठपुरावा सुरु
विशेष प्रतिनिधी जळगाव : फैजपूर नगरपालिकेच्या प्रदीर्घ काळापासून प्रलंबित असलेल्या हद्दवाढीचा प्रश्न पुन्हा एकदा ऐरणीवर आला आहे. या संदर्भात मुंबईतील मंत्रालयात नगरविकास विभागाच्या वरिष्ठ अधिकाऱ्यांसोबत महत्त्वपूर्ण बैठक पार पडली. फैजपूर शहराचा वाढता विस्तार आणि भविष्यातील नागरी गरजा लक्षात घेता हद्दवाढीचा प्रस्ताव तातडीने मार्गी लावण्याची मागणी या बैठकीत करण्यात आली.
या वेळी फैजपूरचे माजी नगराध्यक्ष शेख कुर्बान शेख हाजी करीम तसेच एम. डी. पिंजारी सर यांनी नगरविकास विभागाच्या सहसचिव वैजापूरकर यांची भेट घेऊन प्रस्तावाबाबत सविस्तर चर्चा केली.
प्रशासकीय कार्यवाहीचा आढावा
बैठकीदरम्यान फैजपूर नगरपालिका हद्दवाढीच्या प्रस्तावाची सद्यस्थिती, आवश्यक प्रशासकीय मंजुरी आणि पुढील कायदेशीर प्रक्रियेबाबत विस्तृत आढावा घेण्यात आला. शहराचा झपाट्याने होत असलेला विस्तार, वाढती लोकसंख्या आणि त्यामुळे नागरी सुविधांवर पडणारा ताण याकडे सहसचिवांचे लक्ष वेधण्यात आले.
नगरपालिकेची हद्दवाढ झाल्यास शहराचा नियोजनबद्ध विस्तार करणे सोपे जाईल. तसेच रस्ते, पाणी, सांडपाणी व्यवस्थापन आणि दिव्यांची सोय यांसारख्या पायाभूत सुविधा नागरिकांना अधिक प्रभावीपणे उपलब्ध करून देणे शक्य होईल, असा मुद्दा या वेळी मांडण्यात आला.
सकारात्मक निर्णयाची अपेक्षा
फैजपूरच्या भविष्यातील विकासाचा व्यापक दृष्टिकोन समोर ठेवून हद्दवाढीचा प्रस्ताव शासनाकडून मंजूर करून घेण्यासाठी सातत्याने पाठपुरावा केला जात आहे. मंत्रालयातील या वरिष्ठ पातळीवरील बैठकीमुळे प्रस्तावाला गती मिळण्याची चिन्ह असून, येत्या काळात शासन स्तरावरून सकारात्मक निर्णय घेतला जाईल, अशी अपेक्षा व्यक्त केली जात आहे.
