भुसावळ (प्रतिनिधी ) ;-एका 27 वर्षे तरुणाची गोळ्या झाडून खून केल्याची घटना आज सकाळी साडेसात वाजेच्या सुमारास भुसावळ शहरातील अमरदीप टाकीजवळ असणाऱ्या एकाच्या दुकानात घडली. यामुळे शहरात प्रचंड खळबळ उडाली असून या खुणाच्या घटनेमुळे शहर पुन्हा धरले आहे. पोलीस मारेकऱ्यांचा कसून शोध घेत असून तरुणावर कोणत्या वादातून गोळ्या झाडल्या याबाबत चर्चेला उधाण आले आहे.
तेहरीन नासीर शेख (27, मचछीवाडा, जाम मोहल्ला, भुसावळ) असे मयत तरुणाचे नाव आहे.
तेहरीन नासीर शेख (27, मच्छीवाडा, जाम मोहल्ला, भुसावळ) हा चहा पिण्यासाठी जाम मोहल्ला भागातील आर.के.किताब घरासमोरील डीडी सुपर कोल्ड्रिंक्स आणि चहाच्या दुकानात शुक्रवारी सकाळी साडेसात वाजता आल्यानंतर दोन दुचाकीवर तोंडाला रूमाल बांधून आलेल्या चार संशयीतांपैकी तिघांनी आपल्याकडील गावठी पिस्तुलातून पाच गोळ्या झाडल्या. या घटनेने दुकानातील ग्राहकांमध्ये पळापळ झाली तर काही क्षणात संशयीत दुचाकीवरून पसार झाले.
शरीरातील विविध भागात गोळ्या लागल्याने तेहरीनचा जागीच मृत्यू झाला तर पोलीस उपअधीक्षक कृष्णात पिंगळे, पोलीस निरीक्षक राहुल वाघ व सहकार्यांनी धाव घेतली. चार संशयीतांचा कसून शोध सुरू आहे. फेब्रुवारी 2023 मध्ये झालेल्या एका खुनाच्या गुन्ह्याचा बदला घेण्यासाठी हा खून करण्यात आल्याची प्राथमिक माहिती आहे.
