जळगाव पोलीस दलासाठी २४ नवीन चारचाकी वाहनांचे लोकार्पण
जळगाव (प्रतिनिधी): जिल्हा पोलीस दलाच्या बळकटीकरणासाठी २ कोटी २५ लाख रुपयांच्या निधीतून २४ नवीन चारचाकी वाहने पोलिसांच्या सेवेत दाखल करण्यात आली. या वाहनांमुळे डायल 112 आपत्कालीन प्रतिसाद यंत्रणा अधिक सक्षम होईल तसेच गस्त व कायदा-सुव्यवस्थेच्या अंमलबजावणीला वेग येईल, असे प्रतिपादन जिल्ह्याचे पालकमंत्री गुलाबराव पाटील यांनी केले.
जलसंपदा मंत्री गिरीश महाजन, पालकमंत्री गुलाबराव पाटील, उद्योगमंत्री संजय सावकारे आणि आमदार राजूमामा भोळे यांच्या हस्ते हिरवा झेंडा दाखवून २४ चारचाकी वाहनांचे लोकार्पण करण्यात आले.
पालकमंत्री पाटील यांनी पोलीस दलासाठी नवीन वाहने, पोलीस ठाण्यांची उभारणी आणि तांत्रिक सुधारणा यावर सातत्याने भर दिला असल्याचे सांगितले. केवळ वाहने उपलब्ध करून देणे हा हेतू नसून, पोलिसांना आधुनिक संसाधने, योग्य प्रशिक्षण आणि आवश्यक सुविधा मिळाव्यात यासाठी कटिबद्ध असल्याचेही त्यांनी स्पष्ट केले.
यावेळी जलसंपदा मंत्री गिरीश महाजन यांनी हे पाऊल पोलिसांच्या बळकटीकरणासाठी महत्त्वाचे असल्याचे सांगून जिल्ह्याची सुरक्षितता ही सर्वोच्च प्राधान्य असल्याचे स्पष्ट केले. वस्त्रोद्योग मंत्री संजय सावकारे यांनी जिल्हा पोलीस दलाच्या सक्षमीकरणाबद्दल आनंद व्यक्त करून शुभेच्छा दिल्या.
या कार्यक्रमाला जिल्हाधिकारी आयुष प्रसाद, जिल्हा पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, जिल्हा नियोजन अधिकारी विजय शिंदे, पोलीस उपअधीक्षक (शहर) संदीप गावित यांच्यासह अनेक पोलीस अधिकारी व कर्मचारी उपस्थित होते.
