पाचोरा (प्रतिनिधी) : पाचोरा शहरात अवैधरित्या शस्त्रविक्री करण्याचा प्रयत्न करणाऱ्या एका इसमाला पोलिसांनी रंगेहाथ पकडत तब्बल १८ तलवारी जप्त केल्या आहेत. या कारवाईमुळे शहरात मोठी खळबळ उडाली आहे. जप्त करण्यात आलेल्या शस्त्रांची किंमत अंदाजे ५४ हजार रुपये इतकी आहे.
दिनांक १८ सप्टेंबर रोजी रात्री सुमारे ११ वाजता पाचोरा पोलिस ठाण्याचे निरीक्षक राहुलकुमार पवार यांना गुप्त माहिती मिळाली की, माहिजी नाका परिसरात एक इसम तलवारी विक्रीसाठी घेऊन आला आहे. तत्काळ पोलिसांनी सापळा रचून सोहेल शेख तय्युब शेख (वय २४, रा. स्मशानभूमी रोड, बाहेरपुरा, पाचोरा) याला ताब्यात घेतले. कसून चौकशीत त्याने गुन्ह्याची कबुली दिली.
पोलिसांच्या चौकशीत उघड झाले की, आरोपीने विक्रीसाठी आणलेल्या १८ तलवारी लपवून ठेवल्या होत्या. त्या तलवारी पोलिसांनी जप्त केल्या. आरोपीने काही तलवारी आधीच विक्री केल्याचे देखील सांगितले आहे.
या प्रकरणी पाचोरा पोलिस ठाण्यात गुन्हा रजि. क्रमांक ४६०/२०२५ नोंद करण्यात आला असून आरोपीवर भारतीय शस्त्र अधिनियम १९५९ चे कलम ४, २५ तसेच महाराष्ट्र पोलीस अधिनियम १९५१ चे कलम ३७(१)(३), १३५ अंतर्गत गुन्हा दाखल करण्यात आला आहे.
ही कारवाई पोलिस अधीक्षक डॉ. महेश्वर रेड्डी, अपर पोलिस अधीक्षक (चाळीसगाव परिमंडळ) सौ. कविता नेरकर, उपविभागीय पोलिस अधिकारी अरुण आव्हाड यांच्या मार्गदर्शनाखाली पार पडली. या मोहिमेत पोलीस निरीक्षक राहुलकुमार पवार, पोउपनिरीक्षक कृष्णा घायाळ, कैलास ठाकूर, पोकॉ संदीप राजपूत, जितेंद्र पाटील व हरीष परदेशी यांनी सहभाग घेतला.या कारवाईमुळे पाचोरा शहरात अवैध शस्त्रविक्रीच्या हालचालींवर पोलिसांनी धडाकेबाज अंकुश ठेवला आहे.
