अवैधरत्या गांजा बाळगणाऱ्याला अटक ;एमआयडीसी पोलिसांची कारवाई
एक लाख ७ हजारांचा मुद्देमाल जप्त
जळगाव (प्रतिनिधी) -: शहरातील मेहरुण बगीचा परिसरात मोटारसायकलवरून फिरत गांजाची विक्री करण्याच्या प्रयत्नात असलेल्या एका आरोपीला एमआयडीसी पोलिसांनीताब्यात घेतले असून त्याच्याकडून ९ किलो ५२२ ग्रॅम गांजा आणि होंडा युनिकॉर्न मोटारसायकल असा एकूण १,०७,१३२ रुपये किमतीचा मुद्देमाल जप्त करण्यात आला आहे.
एमआयडीसी पोलीस स्टेशनचे पोलीस नाईक प्रदीप चौधरी यांना गोपनीय माहिती मिळाली की, एक इसम गांजा विक्रीच्या उद्देशाने मेहरुण बगीचा परिसरात फिरत आहे. त्यांनी तात्काळ पोलीस निरीक्षक संदीप पाटील यांना कळविले. त्यानंतर पो. उपनिरीक्षक राहुल तायडे, चंद्रकांत धनके, सफौ दत्तात्रय बडगुजर, पोना योगेश बारी, पो. का. नितीन ठाकुर, राहुल घेटे, योगेश घुगे यांच्या पथकाने शोधमोहीम हाती घेतली.
संशयित शिवाजी महाराज उद्यान, मेहरुण बगीचा परिसरात असल्याची माहिती मिळताच पोलिसांनी चारही बाजूंनी सापळा रचून त्याला अटक केली. झडती घेतली असता त्याच्याजवळ गांजाने भरलेली एक मोठी गोणी आढळून आली.
संशयित मुकेश विष्णु अभंगे (वय ४३, रा. कंजरपाडा, तांबापूर, जळगाव) याच्या ताब्यातून ९ किलो ५२२ ग्रॅम गांजा, होंडा युनिकॉर्न मोटारसायकल असा १,०७,१३२ रुपयांचा मुद्देमाल जप्त करण्यात आला आहे.
या प्रकरणी पोलीस नाईक प्रदीप चौधरी यांच्या फिर्यादीवरून एनडीपीएस कायदा कलम ८(क), २०(ब) प्रमाणे गुन्हा दाखल करण्यात आला आहे. संशयित आरोपीला अटक करण्यात आली असून पो. उपनिरीक्षक सचिन नवले आणि पोलीस कर्मचारी चेतन पाटील या प्रकरणाचा तपास करत आहेत.
यांनी केली कारवाई
ही कारवाई पोलीस अधीक्षक महेश्वर रेड्डी, अपर पोलीस अधीक्षक अशोक नखाते आणि उपविभागीय पोलीस अधिकारी संदीप गावित यांच्या मार्गदर्शनाखाली पार पडली. एमआयडीसी पोलीस ठाण्याने नागरिकांना आवाहन केले आहे की, अवैध अंमली पदार्थ विक्रीविषयी माहिती मिळाल्यास तात्काळ पोलिसांना कळवावे. माहिती देणाऱ्याचे नाव गोपनीय ठेवले जाईल.
