जळगावचे नवे जिल्हाधिकारी रोहन घुगे यांनी पदभार स्वीकारला; जिल्हा विकासाला नवी दिशा मिळण्याची अपेक्षा
प्रतिनिधी | जळगाव ठाणे जिल्हा परिषदेचे माजी मुख्य कार्यकारी अधिकारी आयएएस रोहन घुगे यांनी आज (गुरुवार) सकाळी जळगाव जिल्हाधिकारी कार्यालयात जिल्हाधिकारी पदाचा कार्यभार स्वीकारला. पदभार स्वीकारल्यानंतर विविध विभागांतील अधिकारी व कर्मचाऱ्यांनी त्यांचे स्वागत केले. यावेळी घुगे यांनी अधिकाऱ्यांशी संवाद साधत जिल्ह्यातील सुरू असलेल्या प्रकल्पांचा आणि प्रशासकीय कामकाजाचा आढावा घेतला.
रोहन घुगे हे भारतीय प्रशासकीय सेवेतील अनुभवी आणि कार्यक्षम अधिकारी म्हणून ओळखले जातात.
यापूर्वी ते जिल्हा परिषद ठाणेचे मुख्य कार्यकारी अधिकारी म्हणून कार्यरत होते. त्यांच्या नेतृत्वाखाली ठाणे जिल्हा परिषदेला डिजिटल प्रशासन, शिक्षण, आरोग्य व ग्रामीण विकास या क्षेत्रात उल्लेखनीय यश मिळाले असून ‘कार्यालयीन मूल्यमापन – १०० दिवसांचा कृती कार्यक्रम’ अंतर्गत राज्यात प्रथम क्रमांक प्राप्त झाला आहे.
दरम्यान, माजी जिल्हाधिकारी आयुष प्रसाद यांची बदली नाशिक येथे झाली असून त्यांच्या जागी रोहन घुगे यांची नियुक्ती करण्यात आली आहे. पदभार स्वीकारताना अपर जिल्हाधिकारी श्रीमंत हारकर व निवासी उपजिल्हाधिकारी वैशाली चव्हाण उपस्थित होते.
