रिंगणगाव सरपंच लाच प्रकरणात तिघांना एसीबीकडून अटक
काव्य रत्नांजली चौकात सापळा; ८० हजारांची लाच स्वीकारताना रंगेहात पकड
जळगाव : प्रतिनिधी शहरातील एका शासकीय कंत्राटदाराकडून हस्तांतर करारनामा करून देण्याच्या मोबदल्यात ८० हजार रुपयांची लाच मागणाऱ्या रिंगणगाव (ता. एरंडोल) येथील सरपंचासह तिघांना लाचलुचपत प्रतिबंधक विभागाने (एसीबी) रंगेहात पकडले. ही कारवाई मंगळवारी सायंकाळी जळगाव शहरातील काव्य रत्नांजली चौकात करण्यात आली.
अटकेतील आरोपींमध्ये रिंगणगावचे सरपंच भानुदास पुंडलिक मते (रा. खोंडेवाडा, ता. एरंडोल), सदस्यपती समाधान काशीनाथ महाजन (३८, रा. युनियन बँकेजवळ, एरंडोल) आणि खाजगी पंटर संतोष नथ्थू पाटील (४९, रा. कल्याणेहोळ, ता. धरणगाव) यांचा समावेश आहे. या कारवाईने रिंगणगाव ग्रामपंचायतीत खळबळ उडाली आहे.
काय आहे प्रकरण?
तक्रारदार हे शासकीय कंत्राटदार असून त्यांनी जलजीवन मिशन अंतर्गत नळ पाणीपुरवठा योजनेतील सुमारे १ कोटी ५० लाख २३ हजार ३२१ रुपयांचे काम पूर्ण केले होते. त्यापैकी १ कोटी २७ लाख २३ हजार ३२१ रुपये इतकी बिलाची रक्कम मिळाली असून २३ लाख रुपये प्रलंबित होते. संबंधित योजनेचे काम ताब्यात घेण्यासाठी आवश्यक असलेला करारनामा अपूर्ण असल्याने देयक थांबले होते.
या संदर्भात ६ ऑक्टोबर रोजी सरपंच भानुदास मते आणि सदस्यपती समाधान महाजन यांची भेट घेतल्यानंतर त्यांनी करारनामा हस्तांतरणासाठी १ लाख रुपयांची लाच मागितली, मात्र शेवटी ८० हजार रुपयांवर तडजोड करण्यात आली.
सापळा आणि अटक
या प्रकरणाची तक्रार ७ ऑक्टोबर रोजी जळगाव एसीबीकडे दाखल करण्यात आली. त्यानंतर मंगळवारी सायंकाळी काव्य रत्नांजली चौकात सापळा रचण्यात आला. खाजगी पंटर संतोष पाटील याने तक्रारदाराकडून लाचेची रक्कम स्वीकारताच एसीबीच्या पथकाने तत्काळ कारवाई करत तिघांनाही बेड्या ठोकल्या.
एसीबीचे यशस्वी पथक
ही कारवाई जळगाव एसीबीचे पोलिस उपअधीक्षक योगेश ठाकूर, पोलिस निरीक्षक स्मिता नवघरे, ग्रेडेडे पीएसआय सुरेश पाटील, नाईक बाळू मराठे, व कॉन्स्टेबल अमोल सूर्यवंशी यांच्या पथकाने यशस्वीरीत्या पार पाडली.
