जळगाव : गोलाणी मार्केटच्या तिसऱ्या मजल्यावरुन पडून फुल भांडारमध्ये काम करणारे फरदीन खान सादिक खान (२७, रा. दूध फेडरेशन परिसर) हा तरुण गंभीर जखमी झाला आहे. ही घटना सोमवारी दुपारी घडली. जखमीवर शासकीय वैद्यकीय महाविद्यालय व रुग्णालयात उपचार सुरु आहेत.
शहरातील मध्यवर्ती परिसरात असलेल्या गोलाणी मार्केटमध्ये विविध व्यावसायिक दुकाने असून तेथे असलेल्या एका फूल भांडारमध्ये फरदीन खान सादीक खान हा काम करतो. सोमवारी दुपारी तो मार्केटच्या तिसऱ्या मजल्यावर असताना पाय सरकल्याने त्याचा तोल गेला आणि त्यांने आधारासाठी तेथे सुरक्षिततेसाठी लावलेल्या रिलिंगला (लोखंडी पाईप)
पकडले. मात्र ते गंजून खराब झालेला असल्याने तो तुटल्यामुळे फरदीन हा तिसऱ्या मजल्यावरुन थेट खाली पडला. यात त्याच्या डोक्याला गंभीर दुखापत झाली असून हातापायालाही मार लागला आहे.
परिसरातील नागरिकांनी जखमी अवस्थेत खान यास शासकीय वैद्यकीय महाविद्यालय व रुग्णालयात दाखल केले होते. दरम्यान, मनपाचे शहर अभियंता मनिष अमृतकर यांनी घटनास्थळी जावून पाहणी केली.
