स्मशानभूमीजवळ पिस्तूल घेऊन फिरणारा ताब्यात; दोन जिवंत काडतुसे जप्त
शनीपेठ पोलिसांची धडक कारवाई; खेडीच्या इसमाविरुद्ध आर्म्स अॅक्टनुसार गुन्हा दाखल
जळगाव : शहरात अवैधरित्या अग्निशस्त्र बाळगणाऱ्यांविरोधात शनीपेठ पोलिसांनी धडक कारवाई करत एका संशयिताला ताब्यात घेतले. स्मशानभूमीजवळील उमेश बियर शॉपी परिसरात सापळा रचून प्रकाश तोलार (रा. खेडी, ता. जळगाव, ह.मु. साई सिटी, जळगाव) याच्याकडून देशी बनावटीचे एक पिस्तूल आणि दोन जिवंत काडतुसे जप्त करण्यात आली.
गोपनीय माहितीवरून पोलिसांची कारवाई
जळगाव जिल्ह्यात अवैधरित्या घातक शस्त्रे व अग्निशस्त्रे बाळगणाऱ्यांविरोधात प्रभावी कारवाई करण्याच्या सूचना पोलीस अधीक्षक श्रीकांत धिवरे यांनी सर्व पोलीस ठाण्यांच्या प्रभारी अधिकाऱ्यांना दिल्या आहेत. त्यानुसार शनीपेठ पोलीस ठाण्याचे प्रभारी अधिकारी विशाल जयस्वाल यांनी अधिकारी व कर्मचाऱ्यांना गोपनीय माहिती संकलित करून कारवाई करण्याचे निर्देश दिले होते.
उमेश बियर शॉपी परिसरात सापळा
१० ऑगस्ट रोजी शनीपेठ पोलीस ठाण्याच्या हद्दीतील स्मशानभूमीजवळील उमेश बियर शॉपी परिसरात एक इसम अवैध अग्निशस्त्र घेऊन फिरत असल्याची माहिती पोलिसांना मिळाली. माहितीची पडताळणी करून पोलिसांनी तत्काळ परिसरात सापळा रचला. यावेळी प्रकाश तोलार याला ताब्यात घेण्यात आले.
पिस्तूल आणि दोन काडतुसे जप्त
संशयिताची झडती घेतली असता त्याच्याकडे देशी बनावटीचे एक पिस्तूल आणि दोन जिवंत काडतुसे आढळून आली. पोलिसांनी शस्त्रसाठा जप्त केला. याप्रकरणी शनीपेठ पोलीस ठाण्यात गुन्हा रजिस्टर क्रमांक १७२/२०२६ दाखल करण्यात आला आहे.
आर्म्स अॅक्ट कलम ३/२५(१-B)(a) तसेच महाराष्ट्र पोलीस अधिनियम कलम १३५ अन्वये पुढील कायदेशीर कारवाई करण्यात येत आहे.
वरिष्ठांच्या मार्गदर्शनाखाली पथकाची कामगिरी
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत आणि उपविभागीय पोलीस अधिकारी नितीन गणापुरे यांच्या मार्गदर्शनाखाली पोलीस निरीक्षक विशाल जयस्वाल यांच्या नेतृत्वाखाली करण्यात आली.
कारवाईत पोलीस उपनिरीक्षक संतोष खेडेकर, परिविक्षाधीन पोलीस उपनिरीक्षक अभिषेक कटारे, ग्रेड पोलीस उपनिरीक्षक नितीन पाटील, पोलीस हेड कॉन्स्टेबल विजय खैरे, योगेश जाधव, पोलीस नाईक महेंद्र पाटील, पराग दुसाने तसेच पोलीस कॉन्स्टेबल अमोल वंजारी, निलेश घुगे, गणेश ढाकणे आणि योगेश साबळे सहभागी झाले होते.
